हेटौंडाः प्रथम बागमती प्रदेश खेलकुद प्रतियोगिता अन्तर्गत आज बुधबार भएको फुटबल प्रतियोगितामा मकवानपुर र धादिङ सेमिफाइनल प्रवेश गरेको छ । हेटौंडा–५ स्थित पिप्ले क्याम्पा रंगशालामा भएको खेलमा मकवापुरले सिन्धुली र धादिङले काभैेपलाञ्चोकलाई हराउँदै सेमिफाइलन प्रवेश गरेको हो ।
बुधबार भएको खेलमा सिन्धुलीलाई ३–० गोल अन्तरले हराउँदै मकवानपुर सेमिफाइनल प्रवेश गरेको हो । मकवानपुरलाई जित दिलाउन ललित चौलागाईं, सुनिल घलान र समिराज थोकरले समान एक–एक गोल गरे । खेलको म्यान अफ द म्याच मकवानपुरका सुनिल घलान घोषित भए । मकवानपुरले अब शुक्रवार सेमिफाइनल खेलमा भक्तपुरसङ्ग खेल्नेछ । मकवानपुरको यो दोस्रो जित हो । मकवानपुरले यस अघि नुवाकोटलाई हराएको थियो । हारसङ्गै सिन्धुली प्रतियोगिताबाट बाहिरिएको छ ।
यस्तै बुधबार नै भएको खेलमा काभ्रेपलान्चोकलाई १–० गोलले हराउँदै धादिङ सेमिफाइनलमा प्रवेश गरेको छ । धादिङको जितमा विपिन कँडेलले निर्णायक गोल गरे । कँडेल म्यान अफ द म्याच घोषित भए । धादिङले अब सेमिफाइनलमा शुक्रवार ललितपुर र रामेछाप बिचको विजेतासङग खेल्नेछ । हारसँगै काभ्रेपलान्चोक प्रतियोगिताबाट बाहिरिएको छ ।
