हेटौंडाः मकवानपुरको राक्सिराङमा लागुऔषध गाँजा १ सय १० किलोसहित एकजनालाई प्रहरीले पक्राउ गरेको छ । पक्राउ पर्नेमा राक्सिराङ–५ का ३६ वर्षीय राम कुमार प्रजा रहेको जिल्ला प्रहरी कार्यालय मकवानपुरका प्रहरी प्रवक्ता जयश्वर रिमालले जानकारी दिनुभएको छ ।
ईलाका प्रहरी कार्यालय मनहरीबाट खटिएको प्रहरी टोलीले गस्ती गर्दै जाने क्रममा सोमबार राति १० बजेर ३० मिनेटको समयमा राक्सिराङ–५ स्थित कच्ची सडकखण्डमा शंकास्पद रुपमा भारी बोकी हिँडिरहेका प्रजालाई सुरक्षाजाँच गर्दा गाँजा फेला परेको प्रहरीले जनाएको छ । प्रजालाई लागुऔषध गाँजासहित नियन्त्रणमा लिई थप अनुसन्धान भइरहेको प्रहरी प्रवक्ता रिमालले जानकारी दिनुभयो । उक्त गाँजा ओसरपसारमा संलग्न रहेका अन्य व्यक्तिहरुको खोजतलास कार्य भइरहेको उहाँले बताउनुभयो ।
