हेटौंडाः साहित्यकार देवराज खरेलको निबन्ध संग्रह जिन्दगीदेखि जिन्दगीसम्म शनिबार लोकार्पण गरिएको छ । मातृभूमि साहित्यिक त्रैमासिक संरक्षक मुक्तिगोविन्द वैद्यको सभाध्यक्षता तथा बागमती प्रदेश लोकसेवा आयोगका अध्यक्ष सुरेशमान श्रेष्ठको प्रमुख आतिथ्यमा खरेलको कृति साहित्य संगम मकवानपुरको सभाकक्षमा विमोचन गरिएको हो ।
गजल मञ्च मकवानपुर र हाम्रो मातृभूमि साहित्यिक त्रैमासिकको संयुक्त आयोजनामा कृति लोकार्पण कार्यक्रम भएको हो । खरेलले आफ्नो जीवनको भोगाई र हेटौंडाको परिवेशमा लेख्नुभएको २१ वटा निबन्ध समेटिएको छ । जिन्दगीदेखि जिन्दगीसम्म खरेलको दोस्रो निबन्ध संग्रह हो भने चौथो कृति हो । खरेलको एउटा कविता संग्रह र एउटा मुक्तक संग्रह प्रकाशित छ ।
पुस्तकका बारेमा समीक्षक घनश्याम घिमिरेले बोल्नुभएको थियो । कृति विमोचन कार्यक्रममा साहित्य संगम मकवानपुरका पूर्वअध्यक्ष आरसी रिजाल, गजल मञ्च मकवानपुरका अध्यक्ष देवराज तिवारी, मकवानपुरका अग्रज साहित्यकार ह्यग्रीव आचार्य, रामचन्द्र फुर्सतीको पनि उपस्थिति रहेको थियो ।
