हेटौंडाः देवकोटा स्मृति सम्मानबाट मकवानपुरका २ जना पुराना स्रष्टाहरु सम्मानित हुने भएका छन् । लामो समयदेखि मकवानपुरको साहित्यमा निरन्तरता दिँदै आएका हयग्रिव आचार्य र रमेशमोहन अधिकारीलाई कात्तिक १८ गते लक्ष्मीपुजाको दिन सम्मान गर्न लागिएको हो ।
साहित्य सङ्गम मकवानपुर र युगप्रकाश क्लव हेटौंडा–११ नवलपुरले संयुक्त रूपमा हरेक वर्षको लक्ष्मीपूजाको दिन यो सम्मान दिँदै आएको छ । देवकोटा स्मृति सम्मान–२०७७ र २०७८ बाट उनीहरुलाई सम्मान गरिने साहित्य संगम मकवानपुरका सचिव डिबी बर्तौलाले जानकारी दिनुभयो । उहाँका अनुसार विगत ७ वर्षदेखि यो सम्मान विशेष गरेर मकवानपुरमा लामो समयदेखि साहित्यमा रहेको पुराना स्रष्टाहरुलाई दिँइदै आएको छ । नगद १० हजारको राशी भएको यो सम्मानबाट यसअघि आरआर चौलागाई, तुलसी थापा लगायत सम्मानित भइसकेका छन् ।
यही कार्तिक १८ गते त्रिभुवन माविमा एक कार्यक्रमको आयोजना गर्दै उनीहरुलाई सम्मान गरिनेछ । साथै सोही दिन प्रभातफेरि हुने, कविता प्रतियोगिता हुने बर्तौलाले बताउनुभयो ।
