हेटौंडाः जनप्रिय नमूना माध्यमिक विद्यालय तथा प्राविधिक शिक्षालयको दिव्यसेवा बाल क्लबले बिहीबार निबन्ध प्रशिक्षण कार्यक्रम गरेको छ । हेटौंडा–१६, हटियास्थित विद्यालयमा गठन भएको बाल क्लबले आयोजना गरेको कार्यक्रममा कवि तथा साहित्यकार सुवास खनालले निबन्ध लेखनका बारेमा प्रशिक्षण दिनुभएको हो ।
४० जना सहभागी रहेको उक्त कार्यक्रम भर्चुअल माध्यम जुमबाट सञ्चालन भएको थियो । कार्यक्रममा निबन्ध लेखनको प्रयोगात्मक पक्षबारे छलफल गरिएको थियो । कार्यक्रममा दिव्यसेवा बाल क्लबका संयोजक युक्तलाल विश्वकर्माले असार ७ गते सोमबार क्लबले निबन्ध प्रतियोगिता गर्न लागेकाले प्रशिक्षण कार्यक्रम गरिएको जानकारी गराउनु भयो ।
प्रशिक्षण कार्यक्रमले विद्यार्थीहरूलाई निबन्ध लेखनमा अभिप्रेरित गरेको विद्यालयका सूचना तथा सञ्चार विभाग प्रमुख सुनिल गौतमले बताउनुभयो । जनप्रियमा दिव्यसेवा बाल क्लबले सिर्जनात्मक गतिविधि सञ्चालन गरिरहेको र आगामी दिनमा थप नयाँ सिर्जनात्मक गतिविधि सञ्चालन गर्न तत्पर रहेको विद्यालयका अंग्रेजी विभाग प्रमुख रविन श्रेष्ठले जानकारी दिनुभयो ।
