हेटौंडाः मकवानपुरे गायक सोभराज तामाङद्वारा निर्मित कान्छी म्युजिक भिडियो सोमबार सार्वजनिक गरिएको छ । सोमबार पत्रकार सम्मेलन गर्दै उक्त म्युजिक भिडियो सार्वजनिक गरिएको हो । म्युजिक भिडियोमा गायक सोभराज तामाङको स्वर रहेको छ भने निरु थिङ, युभास श्रेष्ठ, दीपक लामा, सुरिना तामाङलगायतको अभिनय रहेको छ ।
यस्तै म्युजिक भिडियोको छायांकन, सम्पादन र निर्देशन विशालराज राईले गर्नुभएका छ । प्रेमकथामा आधारित रहेको म्युजिक भिडियोको रेकर्डिङ हेटौंडामा नै गरिएको निर्देशक राईले बताउनुभयो । म्युजिक भिडियोको छायांकन मकवानपुरको भैंसे, रातोमाटे पार्क, शितलमहल चोक तथा सल्लाघारीलगायतका क्षेत्रमा गरिएको निर्देशक राईले बताउनुभयो । करिब १ लाख भन्दा बढीको लागतमा उक्त म्युजिक भिडियो निर्माण गरिएको उहाँले बताउनुभयो ।
कार्यक्रम कलाकार विष्ठ गोपाल सिंहको प्रमुख आतिथ्यतामा भएको हो । कार्यक्रममा मकवानपुर तामाङ संघका उपाध्यक्ष अनुपराज तामाङ, मकवानपुर तामाङ संघका सचिव विक्रम लामा, कलाकार मञ्चका सल्लाहकार दीपक मोक्तान, कलाकार सोमराज तामाङ र गायक सविन थिङलगायतको उपस्थिति थियो ।
