हेटौंडाः राष्ट्रपति रनिङ्गशिल्ड प्रतियोगिताको मकवानपुर जिल्ला छनोट आजबाट सुरु भएको छ । हेटौंडा–४ हुप्रचौरमा आज बिहान जिल्ला खेलकुद विकास समितिले औपचारिक कार्यक्रम आयोजना गरि प्रतियोगिताको उद्घाटन गरेको हो ।
जिल्ला समन्वय समिति मकवानपुरका प्रमुख रघुनाथ खुलालले एथलेटिक्स तर्फको सटपुट खेल खेलेर प्रतियोगिताको उद्घाटन गर्नुभएको थियो । प्रतियोगितामा जिल्लाका १० वटै पालिकाभित्रका बिद्यार्थीहरुको सहभागिता रहेको छ । छात्र/ छात्राको भलिबल, र एथलेटिक्सका खेलहरु हुप्रचौरमा भैरहेका छन भने कबड्डिका खेलहरु हेटौंडा ४ स्थित कभर्डहलमा भैरहेको छ । खेलहरु आधुनिक राष्ट्रिय माबिको संयोजनमा भैरहेको हो ।
जिल्ला खेलकुद विकास समिति मकवानपुरका अध्यक्ष सानु लामाको सभाध्यक्षतामा भएको उद्घाटन कार्यक्रममा पालिका प्रमुखहरु लगायत खेलकुद क्षेत्रका पदाधिकारी सहित खेलाडी विद्यार्थीहरुको उपस्थिती रहेको थियो । यस्तै सोही कार्यक्रमका बिच जिल्ला खेलकुद विकास समितिले आधुनिक राष्ट्रिय माबि हेटौंडा ४ का प्रधानाध्यापक बिरबंश बैठालाई सम्मन गरेको छ । केही समय अघिमात्र एसियाकै उत्कृष्ट प्रधानाध्यापक घोषित हुनुभएका बैठालाई दोसल्ला ओढाएर सम्मानपत्रसहित सम्मान गरिएको हो ।
