हेटौंडाः जिल्ला प्रहरी कार्यालय मकवानपुरले मकवानुरको विभिन्न स्थानबाट मोटरसाइकल चोरी गर्ने ३ जनालाई पक्राउ गरेको छ । सोमबार हेटौंडा–१८ बस्ने २९ वर्षीय जगदिश ढुंगानाको हेटौंडा–४ हुप्राचौरस्थित सडक छेउमा पार्किङ गरेर राखेको बा ८० प ५०४५ नम्बरको पल्सर मोटरसाइकल चोरी भएको थियो ।
प्रहरीले सोहीदिन हुप्रचौरस्थित सडकबाट मनहरी–४ बस्ने २९ वषीय प्रेम राई र राक्सिराङ–३ का २१ वर्षीय प्रकाश थिङलाई चोरी भएको मोटरसाइकलसहित पक्राउ गरेको जिल्ला प्रहरी कार्यालय मकवानपुरका प्रहरी प्रवक्ता प्रहरी नायब उपरीक्षक जयश्वर रिमाले बताउनुभयो ।
आइतबार पनि हेटौंडा–२, चौकीटोलस्थित सडक छेउमा पार्किङ गरी राखेको ना ४८ प २५७५ नम्बरको पल्सर मोटरसाइकल चोरी भएको थियो । मकवानपुरको मनहरी गाउँपालिका वडा नम्बर ९ बस्ने सरोजकुमार श्रेष्ठले आफ्नो मोटरसाइकल हराएको उजुरी दिएपछि प्रहरीले मोटरसाइकलसहित चोरीमा संलग्नलाई पक्राउ गरेको हो ।
जिल्ला प्रहरी कार्यालय मकवानपुरबाट खटिएको विशेष टालीले सो मोटरसाइकल मंगलबार चितवनको भरतपुर महानगरपालिका वडा नं. ११ बाट फेला पारेको थियो । भरतपुर महानगरपालिका वडा नम्बर ११ बस्ने २१ वर्षीय विजय बोहराले मोटरसाइकल लुकाईछिपाई राखेको अवस्थामा मोटरसाइकलसहित बोरोरालाई प्रहरीले नियन्त्रणमा लिएको हो । उनीहरुलाई नियन्त्रणमा लिएर मोटरसाइकल चोरी गर्ने गिरोहबारे थप अनुसन्धान भइरहेको जिल्ला प्रहरी कार्यालय मकवानपुरले जनाएको छ ।
