हेटौंडाः अखिल नेपाल महिला संघ (अनेमसंघ) मकवानपुरले ११ औं अन्तर्राष्ट्रिय महिला दिवस मनाएको छ । हेटौंडा–४ स्थित पशुपति मन्दिरको सभाहलमा सोमबार अनेमसंघले कार्यक्रम गरेर महिला दिवस मनाएको हो ।
अनेमसंघका जिल्ला अध्यक्ष तथा भीमफेदी गाउँपालिकाकी उपाध्यक्ष पार्वती रानाको सभाध्यक्षता एवम् बागमती प्रदेशका मुख्यमन्त्री डोरमणि पौडेलको प्रमुख आतिथ्यतामा कार्यक्रम भएको थियो । कार्यक्रममा मकवानपुर क्षेत्र नम्बर १ का प्रतिनिधिसभा सदस्य कृष्णप्रसाद दाहाल, राष्ट्रियसभाका सांसद रामचन्द्र राई, नेकपाका केन्द्रीय सदस्य रामेश्वर राना, बागमती प्रदेशसभा सदस्य जुनेली श्रेष्ठ, नेकपा मकवानपुरका अध्यक्ष एकालाल श्रेष्ठलगायतको आतिथ्यता थियो ।
कार्यक्रममा विभिन्न सहकारी, आमा समूहलगायतका संस्थाहरुबाट सहभागी भएका महिलाहरुले नाच–गीत, कविता, नाटकलगायत प्रस्तुत गरेका थिए । महिला हिंसा, भेदभाव, बलात्कारलगायत महिलाका समस्या एवम् चुनौतीका बारेमा सचेतनामूलक क्रियाकलापहरु सञ्चालन गरिएको थियो ।
