हेटौंडाः मकवानपुरको भीमफेदी गाउँपालिकामा पालिकास्तरीय राष्ट्रपति रनिङ्ग शिल्ड प्रतियोगिता सम्पन्न भएको छ । गाउँपालिकाको प्राविधिक सहयोग तथा लाख बजेटमा महेन्द्र माध्यमिक विद्यालयले भिमफेदी—६ सिमलटारमा प्रतियोगिताको आयोजना गरिएको भीमफेदी गाउँपालिकाको शिक्षा शाखाका शैक्षिक सुपरीवेक्षक तथा प्रतियोगिताका प्राविधिक संयोजक गोविन्द चौलागाई जानकारी दिनुभएको छ ।
भीमफेदी गाउँपालिकामा रहेको ८ वटा माध्यमिक विद्यालय मध्ये ७ वटा विद्यालयले सहभागिता जनाएको थियो । २६ वटा खेलमा तीन सय २० जना खेलाडीले सहभागिता जनाएको प्रतियोगितामा १० स्वर्णसहित लेकाली बसिफाँट मावि प्रथम हुन सफल भयो भने ९ स्वर्णसहित महेन्द्र मावि द्वितीय भएको छ । भलिबल पुरुषतर्फ लेकाली बसिफाँट र महिलातर्फ कृष्ण मावि प्रथम भएका छन् ।
शनिबार सम्पन्न भएको प्रतियोगिताको २६ विधाका उत्कृष्ट तथा विजेताहरुलाई प्रमाणपत्र वितरण गरिएको छ । प्रतियोगिताका विजेता, उपविजेताहरुलाई भीमफेदी गाउँपालिकाका अध्यक्ष हिदम लामा, उपाध्यक्ष पार्वती रानाले शिल्ड, मेडल तथा प्रमाणपत्र वितरण गर्नुभएको थियो । २६ खेलमा विजेता तथा उपविजेता बनेका ७० जना खेलाडीले जिल्लास्तरीय राष्ट्रपति रनिङ शिल्ड प्रतियोगितामा सहभागिता जनाउन पाउनेछन् ।
