हेटौंडाः पब्लिक क्याम्पस प्राध्यापक संघ नेपाल मकवानपुर बहुमुखी क्याम्पस इकाईको अध्यक्षमा केशव तिमल्सिना चयन हुनुभएको छ । शुक्रबार तिमल्सिनाको अध्यक्षतामा सर्वसम्मत ११ सदस्यीय समिति चयन गरेको हो । समितिको उपाध्यक्षमा शेखर थपलिया, सचिवमा उमेश अर्याल, कोषाध्यक्षमा दिनेश विडारी र सहसचिवमा गौतम केसी चयन हुनुभएको छ ।
संघको सदस्यमा खिलप्रसाद बराल, रविन कोइराला, उमेश महत, कृष्ण पौडेल, चिरञ्जीवी लामिछाने र सोलार अधिकारी चयन हुनुभएको निर्वाचन समितिका संयोजक राजेन्द्र भट्टराईले जानकारी दिनुभएको छ । भट्टराईको संयोजकत्वमा भीमप्रसाद तिमल्सिना र श्याम छत्कुली सदस्य रहेको तीन सदस्यीय निर्वाचन समिति गठन गरिएको थियो ।
गत शनिबार प्राध्यापक संघको अधिवेशन भएको हो । अधिवेशनको उद्घाटन गरेर निर्वाचन समिति गठन गर्दै उम्मेदवारी दर्ताको कार्यक्रम पूरा भई पुस १८ गते शनिबारका लागि मदतानको कार्यक्रम तय गरिएको थियो । उम्मेदवारी दर्ता गरेका केही सदस्यले उम्मेदवारी फिर्ता गरेसँगै सर्वसम्मत नयाँ समिति गठन गरिएको हो । निवर्तमान अध्यक्ष भोजराज ढकालले आफ्नो कार्यकालमा सहयोग गर्ने सम्पूर्णप्रति आभार व्यक्त गर्दै नयाँ समितिलाई शुभकामना समेत प्रदान गर्नुभएको छ ।
