हेटौंडाः सडक डिभिजन हेटौंडाले ठेक्का सम्झौताअनुसार निर्माण योजना पूरा नगर्ने निर्माण कम्पनिसँगको ठेक्का सम्झौता तोडेको छ । सडक डिभिजन कार्यालयसँगको सर्तनामा बमोजिम काम गर्न ठेक्का सम्झौता गरेका २१ वटा निर्माण कम्पनिसँगको ठेक्का तोकिएको सूचना आज प्रकाशित गरिएको छ ।
आर्थिक वर्ष २०६५/६६ देखि आर्थिक वर्ष २०७०/७१ सम्मका ठेक्का सम्झौता गरेर काम नगर्ने कम्पनिसँगको ठेक्का तोड्दै सडक डिभिजन कार्यालयले सार्वजनिक खरिद ऐन २०६३ बमोजिम बैंक जमानत जफत गरी बाँकी कामको रकम सरकारी बाँकी सरह असुल उपर गर्ने र निर्माण कम्पनिलाई कालो सूचिमा राख्ने प्रक्रिया अगाडि बढाउने निर्णय गरेको सडक डिभिजन हेटौंडाका प्रमुख योगेश सुमनले जानकारी दिनुभएको छ । मकवानपुर, बारा र पर्सा जिल्लाका विभिन्न योजनाको ठेक्का तोडिएको उहाँले जानकारी दिनुभयो ।
डिभिजन सडक हेटौंडाले मकवानपुरका ७ वटा निर्माण कम्पनि, पर्साका ६ वटा कम्पनि, बारा जिल्लाका ३ कम्पनि र काठमाडौंका एक निर्माण कम्पनि रहेका छन् । निर्माण कम्पनिले सम्झौताको म्याद समाप्त भई पटक पटक म्याद थप गरेर पनि लामो अवधिसम्म सम्झौता बमोजिम कार्य सम्पन्न नगरेकोले ठेक्का तोड्ने निर्णय गरिएको जनाएको छ ।
सडक डिभिजन हेटौंडाले आज प्रकाशित गरेको ठेक्का तोडिएको सूचना ।
