हेटौंडाः हेटौंडा–५, पिप्लेका डा. उमेश ढुङ्गेलले पहिलो महिनाको तलबबाट पिप्लेमा निर्माणाधीन कभर्डहललाई आर्थिक सहयोग गर्नुभएको छ । डा. ढुङ्गेलले पहिलो महिनाको तलबबाट १७ हजार रुपैयाँ कभर्डहललाई सहयोग गर्नुभएको पिप्ले युवा क्लबका अध्यक्ष सुशील घिमिरेले जानकारी दिनुभयो ।
डा. ढुङ्गेलले मंगलबार सहयोग रकम हस्तान्तरण गर्नुभएको हो । यसअघि मंगलबार नै रोजगारीको सिलसिलामा हाल क्यानडामा बस्दै आउनुभएका मकवानपुरका पूर्व फुटबल खेलाडी हेटौंडा–९ निवासी अमुन गुरुङले ५० हजार रुपैयाँ सहयोग गर्नुभएको थियो । दैनिकजसो देश–विदेशबाट कभर्डहलको निर्माणका लागि सहयोग प्राप्त भइरहेको छ भने निर्माणकार्य अन्तिम चरणमा पुगेको पिप्ले युवा क्लबका अध्यक्ष घिमिरेले बताउनुभयो ।
