हेटौंडाः राष्ट्रिय समावेशी आयोगकी कार्यवाहक अध्यक्ष विष्णु ओझाले हेटौंडा–६, गौरिटारस्थित आइसोलेसन वार्डको निरीक्षण गर्नुभएको छ । कोरोना भाइरस सङ्क्रमितहरुलाई उपचारका लागि राख्न निर्माण गरिएको आइसोलेसन कक्षको व्यवस्थापनको विषय बुझ्न सोमबार निरीक्षण गरिएको ओझाले जानकारी दिनुभएको छ ।
आइसोलेसन वार्डको व्यवस्थापनका विषयमा गुनासो सुनिए पनि निरीक्षणका क्रममा त्यस्तो कमिकमजोरी नदेखिएको, आइसोलेसनमा बस्दै आएका र डिस्चार्ज हुँदै गरेकाहरुसँग कुराकानी गर्दा उनीहरुले सन्तोषजनक व्यवस्थापन भएको प्रतिक्रिया दिएको ओझाले बताउनुभयो । स्वास्थ्यकर्मीसँग पनि व्यवस्थापनको विषयमा बुझेर आइसोलेसन वार्डमा बेड थप्नका लागि भइरहेको काम पनि सन्तोषजनक पाइएको ओझाले जानकारी दिनुभएको छ । राष्ट्रिय समावेशी आयोगकी कार्यवाहक अध्यक्ष विष्णु ओझासँगै नेकपा मकवानपुर जिल्ला कार्यालय कमिटीका सदस्य एकलाल श्रेष्ठ पनि सहभागी हुनुहुन्थ्यो ।
