हेटौंडाः हेटौंडामा आज भएको रक्तदान कार्यक्रममा ६७ जनाले रक्तदान गरेका छन् । मुस्लिम युवा समाज मकवानपुरको आयोजनामा आज बिहान रक्तसञ्चार केन्द्र, हेटौंडा शाखामै रक्तदान कार्यक्रमको आयोजना गरिएको थियो ।
कार्यक्रममा जिल्ला समन्वय समिति मकवानपुरका प्रमुख रघुनाथ खुलालको प्रमुख आतिथ्यता रहेको थियो । कार्यक्रममा नेकपा मकवानपुरका नेता एकलाल श्रेष्ठ, जिल्ला युवा समिति मकवानपुरका अध्यक्ष सन्तोष चौलागाई, हेटौंडा उपमहानगर खेलकुद विकास समितिका अध्यक्ष चन्द्र शाहीको पनि उपस्थिति रहेको थियो ।
आज सङ्कलित रगतले मागअनुसार आपूर्ति व्यवस्था मिलाउन सहज भएको रक्तसञ्चार केन्द्र हेटौंडाका प्रमुख टंक दाहालले बताउनुभएको छ । रगतको अभावका कारण रक्तसञ्चार केन्द्र हेटौंडाले अनकल (बोलाउँदा आउने) रक्तदातालाई बोलाएर रगत संकलन गर्ने गरेको थियो । यसअघि लायन्स क्लब र पुष्पलाल मित्रता केन्द्रले रक्तदान कार्यक्रमको आयोजना गरेको थियो ।
