हेटौँडा : राष्ट्रियस्तरको गोल्डकप फुटबल प्रतियोगिताको आयोजना, आफ्नै लगानी र श्रमदानमा रंगशाला निर्माण, फुटबल एकेडेमी नै सञ्चालनको अन्तिम तयारीमा रहेको मकवानपुरको बागमती गाउँपालिका खेलकुद क्षेत्रमा देशकै उत्कृट स्थानीय तहकोरुपमा सम्मानित भएको छ । राष्ट्रिय खेलकुद परिषद् (राखेप) को ६२ औं वार्षिकोत्सवको अवसरमा काठमाडौंमा आयोजित एक समारोहमा मकवानपुरको बागमती गाउँपालिकालाई शुक्रबार सम्मान गरिएको हो ।
आर्थिक अवस्था कमजोर भएकाले क्षमता भएर पनि माथि आउन नसकेका खेलाडीहरुलाई पालिकाले खेलकुद एकेडेमीमा राखेर पढाईसँगै प्रशिक्षण गराउने उद्देश्यले खेलाडीको छनौट गरिरहेको छ भने सर्वाधिक पुरस्कार राशी रहेको गोल्डकपको आयोजना र श्रमदानबाट खेल मैदानहरुको निर्माण र पालिकाले खेलकुदमा बजेट नै विनियोजन गरेर योगदान गरेकोमा राखेपले सम्मान गरेको बताइएको छ । नेपाली खेलकुद क्षेत्रको विकास र विस्तारमा पालिकाले गरेको कार्य उदाहरणीय रहेको भन्दै सम्मान गरेको हो ।
नेपाल सरकारका युवा तथा खेलकुदमन्त्री तेजुलाल चौधरी र राखेपमा सदस्य सचिव टंकलाल घिसिङ लगायतले बागमती गाउँपालिकाका अध्यक्ष सर्केश घलान, प्रमुख प्रशासकीय अधिकृत ओम बहादुर दर्जी, बागमती गाउँपालिकाका खेलकुद समितिका अध्यक्ष रहर सिं थिङ र निवर्तमान अध्यक्ष अरुण बल लगायतलाई सम्मानपत्र प्रदान गर्नुभयो ।
राखेपले हरेक वर्ष खेलकुद क्षेत्रमा गरेको लगानी, प्रतियोगिता आयोजना, पूर्वाधार निर्माण, खेलाडी उत्पादन र प्रोत्साहन लगायतको विभिन्न प्रतियोगिताको नतिजाहरुको मुल्यांकन गर्दै एक स्थानीय तहलाई सम्मान गर्दै आइरहेको छ । बागमती गाउँपालिकाले आफ्नै लगानीमा फुटबल रंगशाला निर्माण, फुटबल एकेडेमी सञ्चालन र राष्ट्रियस्तरको गोल्डकप सञ्चालन गर्दै आइरहेको छ । राखेपले आफ्नो वार्षिकोत्सवमा ५ खेलाडीसहित विभिन्न १८ विधामा सम्मान गरेको छ ।
