हेटौंडाका घरघरमा कृष्ण लिला (बालकृष्णहरुको फोटो फिचर)

हेटौंडाः आज भाद्र कृष्णाष्टमी तिथि अर्थात श्रीकृष्ण जन्माष्टमी । वैदिक सनातन धर्मावलम्बीले ‘श्रीकृष्ण जन्माष्टमी’ पर्व आज देशभर भगवान् श्रीकृष्णको पूजा–आराधना गरी श्रद्धा–भक्तिपूर्वक मनाउँदैछन् । ज्ञानयोग, कर्मयोग र भक्तियोगका प्रणेता श्रीकृष्णको जन्म द्वापरयुगमा भाद्रकृष्ण अष्टमीको मध्यरातमा भएकाले आजको दिनलाई ‘श्रीकृष्ण जन्माष्टमी’ र रातलाई ‘मोहरात्रि’ भनिन्छ ।

यस दिन देशभरिका कृष्ण मन्दिरमा भगवान् श्रीकृष्णको पूजा–आराधना, प्रवचन, भजनकीर्तन गर्नाका साथै विशेष गरी महिला, पुरुष ‘व्रत’ बसी रातभर जाग्राम बस्ने प्रचलन छ । अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान् विष्णुको आठौं अवतारका रूपमा जन्मनुभएका श्रीकृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गर्नुभएको थियो ।

धार्मिक ग्रन्थमा सुपात्रको रुपमा चित्रित भगवान श्रीकृष्णको जन्मदिन अर्थात कृष्णाष्टमीको अवसरमा हेटौंडाका अभिभावकले आफ्ना सन्तानलाई कृष्णको रुपमा सजाएर आज विशेष उल्लास मनाएका छन् । कोरोना भाइसर सङ्क्रमितको संख्या बढेपछि हेटौंडा उपमहानगरक्षेत्रमा स्थानीय प्रशासनले निषेधाज्ञा जारी गरेसँगै फुर्सदमा घरमै भएका अभिभावकले आफ्ना सन्तानलाई कृष्णको रुपमा तयार पारेर सुन्दर तस्वीरहरु सामाजिक सञ्जालमा सार्वजनिक गरेका छन् । तिनै फोटाहरु मध्ये केही छानिएका फोटाहरुलाई अभिभावकको नाम र ठेगानासहित सार्वजनिक गरिएको छ ।