हेटौंडाः रोटरी क्लब अफ मकवानपुरले नयाँ सदस्यलाई अभिमुखीकरण कार्यक्रम गरेको छ । क्लबको नियमित बैठकको क्रममा शुक्रबार साँझ ११ जना नयाँ सदस्यलाई अन्तर्राष्ट्रिय स्वयंसेवी संस्था रोटरी क्लबका बारेमा जानकारी गराइएको हो । रोटरी क्लब अफ हेटौंडाका पूर्वअध्यक्ष एवम् रोटरी इन्टरनेशनल डिष्ट्रिक्ट ३२९२ का नयाँ क्लब सल्लाहकार सिद्धिलाल श्रेष्ठले नयाँ सदस्यलाई अभिमुखीकरण गराउनुभएको हो ।
सामाजिक सेवाको क्षेत्रमा कार्य गर्ने गरी संसारभर स्थापित रोटरी इन्टरनेशनल डिष्ट्रिक्ट ३२९२ को सदस्य मकवानपुरमा दुईवटा क्लबहरु रहेका छन् । रोटरी क्लब मकवानपुरका अध्यक्ष कविन सांगामीको अध्यक्षतामा नयाँ सदस्यका लागि अभिमुखीकरण कार्यक्रम भएको हो । रोटरी क्लब अफ मकवानपुरका प्रशासनिक निर्देशक अनिल अग्रवालको संयोजकत्वमा भएको अभिमुखीकरणमा क्लबले गर्नुपर्ने काम, गर्दै आएको काम, क्लबका पदाधिकारीको भूमिकाका बारेमा सिद्धिलाल श्रेष्ठले जानकारी गराउनुभएको थियो ।
कार्यक्रममा रोटरी क्लब अफ मकवानपुरका पूर्वअध्यक्ष विजयलाल श्रेष्ठ, रोट्र्याक्ट क्लब अफ मकवानपुरका अध्यक्ष महेन्द्र राना मगर, निवर्तमान अध्यक्ष पुष्पराज अधिकारीको पनि उपस्थिति रहेको थियो । ४१ सदस्य रहेको रोटरी क्लब अफ मकवानपुरमा ११ जना नयाँ सदस्य थपिन लागेको हो ।
