हेटौँडा : बागमती प्रदेशको प्रतिपक्षी दलहरुले सरकार असफल सावित भएको टिप्पणी गरेको छ । प्रदेशसभाका प्रतिपक्षी दलहरुले प्रदेशसभाको बैठक आव्हान भइरहँदा सरकारले हठात् चालु अधिवेशन अन्त्य गर्ने निर्णयले आफ्नो असफलता देखाएको बताएको छ । बुधबार प्रदेशसभा सचिवालय हेटौँडामा पत्रकार सम्मेलन गर्दै प्रदेश सभा छलेर सरकारले निरंकुश शैली देखाएको बताएको हो । प्रतिपक्षी दलहरुले सरकारले प्रदेश सभा छलेर गैरजिम्मेवार बनिरहेको दावी गरेको छ ।
प्रदेशसभाको प्रमुख प्रतिपक्षी दल नेकपा माओवादी केन्द्र, प्रतिपक्षी दल राप्रपा, नेकपा एकीकृत समाजवादीले सरकारले आफ्नो कमिकमजोरी र असफलतालाई ढाकछोप गर्न प्रदेश सभा छल्ने कार्य गरेको बताएको हो । माओवादी केन्द्र बागमती प्रदेश संसदीय दलका प्रमुख सचेतक रत्नप्रसाद ढकालले सरकारको उक्त प्रवृत्तिले सरकार र प्रतिपक्षी दलबीच द्वन्द्वको स्थिति निम्तिन सक्ने सम्भावना देखिएको बताउनुभयो । ‘सरकारले हठात अधिवेशन अन्त्य गर्ने निर्णय गरेको छ । सरकार प्रदेशसभाबाट भागेर गैरजिम्मेवार ढंगबाट प्रस्तुत भएको छ’, उहाँले भन्नुभयो, ‘दलहरु बीच छलफल चलिरहँदा अधिवेशन अन्त्य गर्ने निर्णयले सरकारको अपरिपक्व दम्भ र निरंकुश शैली उदांगिएको छ ।’
सरकारको उक्त निर्णयले कार्यपालिका र व्यवस्थापिका बीचको दूरी बढाउने काम गरेको उहाँको आरोप छ । प्रदेश सभामा प्रतिनिधित्व गर्ने सबै राजनीतिक दलहरु बीच भएको सहमति, गत असोजको ११-१२ गतेको अविरल वर्षापछि राहत उद्दार र पूनःनिर्माण विषय आलटाल गर्ने काम गरेको उहाँले बताउनुभयो । उहाँका अनुुसार सरकारका कारणले आगामी बजेट अधिवेशनलाई पनि अनिश्चित दिशामा धकेलिने सम्भावन बढेको छ । दलहरु बीचको सहमति र सहकार्यबाट भाग्ने सरकारले नीति, कार्यक्रम र बजेट समेत ल्याउने नैतिकता गुमाएको उहाँले बताउनुभयो । सरकारले गैरजिम्मेवार हर्कत छाडेर वार्ता र सहमति मार्फत अगाडि बढ्न उहाँले माग गर्नुभएको छ ।
प्रमुख सचेतक ढकालका अनुसार सरकारले प्रदेश सभाको हिउँदे अधिवेशनमा ४ दिन बैठक संचालन गरेको छ । प्रदेश सभाको हिउँदे अधिवेशनमा पारित हुनु पर्ने ४ विधेयक पनि अन्योलमा परेको प्रमुख सचेतक ढकालले बताउनुभयो ।
