हेटौंडाः हेटौंडा उपमहानगरपालिकाले गत आर्थिक वर्षमा नगरका अशक्त, असहाय तथा विपन्न ज्येष्ठ नागरिकलाई सहायक सामग्री हस्तान्तरण गरेको छ । उपमहानगरले १९ वटै वडामा ५ जनाका दरले ९५ जनालाई सहायक सामग्री हस्तान्तरण गरेको हो । ज्येष्ठ नागरिकलाई सहायक सामग्री वितरणका लागि हेटौंडा उपमहानगरपालिकाले गत आर्थिक वर्षमा ५ लाख बजेट विनियोजन गरिएको थियो ।
बजेट थोरै भए पनि कार्यक्रम जनतामुखी भएको हेटौंडा उपमहानगरपालिकाको सामाजिक विकास महाशाखा अन्तर्गत महिला विकास शाखाकी प्रमुख बिष्णु कुमारी लामिछानेले बताउनुभयो ।
उपमहानगरपालिकाको सामाजिक विकास समितिले प्रत्येक वडाबाट ५ जनालाई छनोट गरेर सहायक सामग्री प्रदान गरिने निर्णय गरेको थियो । नगरपालिकाले सोही अनुसार वडा-वडामा पुगेर सहायक सामग्री प्रदान गरेको छ । वडामा उपस्थित हुन नसक्नेलाई घर-घर मै गएर सहायक सामग्री हस्तान्तरण गरिएको शाखा प्रमुख लामिछानेले बताउनुभयो । उपमहानगरले अशक्त र कठिन अवस्थामा रहेका बृद्धा/बृद्धा आवश्यक्ता अनुसार सहायक सामग्री हस्तान्तरण गरिएको उहाँले बताउनुभयो । प्रतिव्यक्ति ५/५ हजार बराबरको सहायक सामग्री प्रदान गरिएको छ । उपमहानगरले प्रतिव्यक्ति १ थान ब्लाङ्केट, एक सेट कपडा र १ थान आल्मोनियमको लौरो प्रदान गरेको हो ।
हेटौंडा उपमहानगरपालिकाले चालु आर्थिक वर्षमा पनि सो कार्यक्रमलाई निरन्तरता दिने भएको छ । उपमहानगरले सो कार्यक्रमका लागि ५ लाख बजेट विनियोजन गरेको छ । चालु आर्थिक वर्षमा कति जनालाई के-के सामग्री प्रदान गर्ने भन्ने विषयमा छलफल भैरहेको उपमहानगरपालिकाले जानकारी दिएको छ ।
