हेटौंडाः मकवानपुरको मनहरी गाउँपालिकाले गत आर्थिक वर्ष २०७६/०७७ मा कृषितर्फको सम्पूर्ण कार्यक्रमहरु सम्पन्न भएको जनाएको छ । गाउँपालिकाले कृषितर्फ गाउँपालिकाका सबै वडाहरुमा विविध कार्यक्रम तथा योजनाहरु सम्पन्न गरी विनियोजित बजेटको ९० प्रतिशत खर्च भएको गाउँपालिकाले बताएको छ । गाउँपालिकाले गत आर्थिक वर्षमा टनेल निर्माण कार्यक्रम, कृषि सामग्री वितरण, माटो परिक्षण, खाद्यान्न बाली र तरकारीको बीउ वितरण, च्याउ खेती तालिम लगायतका कार्यक्रमहरु सम्पन्न भएको जानकारी दिएको छ ।
गाउँपालिकामा जैविक तरकारी प्लाष्टिक हाउस (टनेल) निर्माण कार्यक्रम सम्पन्न भएको गाउँपालिकाकी कृषि प्राविधिक यशोधा दुलालले जानकारी दिनुभयो । उहाँका अनुसार गाउँपालिकाले गत आर्थिक वर्ष २०७६/०७७ मा टनेल कार्यक्रमका लागि २९ लाख विनियोजन गरेको थियो । गाउँपालिकाको वडा नम्बर १, २, ३, ४, ५, ७ र ९ मा सञ्चालन गरिएको कार्यक्रमबाट ४० जना किसानहरु लाभान्वित भएको उहाँले बताउनुभयो । फलामको प्रयोग, थोपा सिचाँइ लगायतमा प्रयोगहरुले थोरै किसानहरु मात्र समेटिएको गाउँपालिकाले बताएको छ । गाउँपालिकाले गत वर्ष वडा नम्बर ३ देखि ९ सम्मको तरकारी किसानहरुलाई तरकारीको बीउहरु वितरण गरेको छ । यस कार्यक्रमको लागि ३ लाख रकम विनियोजन भएको थियो । सिमि, कांक्रो, खुर्सानी तथा विभिन्न लहरे तरकारीहरुका बीउ वितरण गरिएको गाउँपालिकाले बताएको छ । त्यस्तै गाउँपालिकाले वडा नम्बर ६ मा खरबुजाको बीउ पनि वितरण गरेको थियो ।
गाउँपालिकाले गत आर्थिक वर्षमा किसानहरुलाई ७५ प्रतिशत अनुदानमा आधुनिक कृषि सामग्रीहरु वितरण गरेको छ । रोडाभेटर ३ थान, हाते ट्याक्टर ३ थान र स्प्रे पम्प ६६ थान गाउँपालिकाका वडा नम्बर ३, ४, ५, ६, ८ र ९ का किसानहरुलाई वितरण गरिएको गाउँपालिकाको कृषि प्राविधिक दुलालले बताउनुभयो । गाउँपालिकाले वडा नम्बर ४, ५ र ७ का विभिन्न स्थानहरुको माटो परिक्षण पनि गरेको छ । सो कार्यक्रमका लागि गत आर्थिक वर्षमा गाउँपालिकाले १ लाख रुपैयाँ बजेट विनियोजन गरेको थियो । गत आर्थिक वर्षमा वडा नम्बर ७ र ९ का कृषक समूह र टोल विकास संस्थाहरुमा आवद्ध किसानहरुलाई च्याउ खेती तालिम प्रदान गरेको गाउँपालिकाले बताएको छ । एक लाख विनियोजन गरिएको सो कार्यक्रमबाट २० जनाले तालिम प्राप्त गरेका छन् ।
गाउँपालिकाले गत आर्थिक वर्षमा विभिन्न वडाहरुमा खाद्यान्न बालीहरुको पनि बीउ वितरण गरेको छ । गाउँपालिकाले वडा १ का किसानहरुलाई विभिन्न जातका मकैको बीउ वितरण गरेको थियो । वडा नम्बर १ को १२ हेक्टर जमिनमा पुग्ने मकैको बीउ वितरण गरिएको गाउँपालिकाले बताएको छ । गाउँपालिकाले वडा नम्बर २, ३, ४, ६, ८ र ९ का धान खेती लगाउने किसानहरुलाई धानको बीउ वितरण गरेको छ । मनहरी गाउँपालिकाका अध्यक्ष एकराज उपे्रतीले आउँदा दिनहरुमा गाउँपालिकालाई कृषि उत्पादनमा अँत्मनिर्भर बनाउँदै धेरै उत्पादन निर्यात गर्न सक्ने बनाउने बताउनुभयो ।
उहाँले चालु आर्थिक वर्षबाटै किसानहरुको समस्यालाई समाधान गर्दै प्रदेश सरकार र संघीय सरकार दुबैसँग सल्लाह र साझेदारी गर्दै कृषिमा आधुनिकीकरण ल्याउने बताउनुभयो । उहाँले किसानहरुमा देखिने मुख्य समस्या रासायनिक मलको अभावलाई समाधान गर्न प्रांगारिक मल उत्पादन गर्ने व्यवस्था मिलाउन आफुले पहल गर्ने बताउनुभयो ।
