हेटौँडा ः हेटौँडा–८, कमानेमा हुन लागेको तेस्रो संस्करणको कमाने प्रिमियर लिग क्रिकेट प्रतियोगिताको खेलतालिका सार्वजनिक भएको छ । कमाने क्रिकेट क्लबले मंगलबार फेसबुक पेज मार्फत खेलतालिका सार्वजनिक गरेको हो ।
८ नम्बर वडा कार्यालयको आयोजनामा माघ १६ गतेदेखि १९ गतेसम्म हुने कमाने प्रिमियर लिग क्रिकेट प्रतियोगिताको उद्घाटन खेलमा कमाने राइडर्स र कमाने राइनोजको टिमबीच प्रतिस्पर्धा हुनेछ । प्रतियोगिता आयोजना गर्नका लागि ८ नम्बर वडा कार्यालयले २ लाख रुपैयाँ बजेट छुट्याएको छ ।
८ वटा टिमको सहभागिता रहने प्रतियोगिता १० ओभरको हुने अध्यक्ष किशोर खत्रीले जानकारी दिनुभएको छ । कमानेभित्रका खेलाडीहरुको पहिचान बढाउन, क्रिकेट खेलको आकर्षण बढाउन, खेलाडीहरुबीच भातृत्वको सम्बन्ध कायम गराउन, खेलाडीलाई राष्ट्रियस्तरमा पु¥याउन र क्रिकेट खेलको महत्वबारे बुझाउनका लागि यस वर्ष पनि प्रतियोगितालाई निरन्तरता दिन लागेको अध्यक्ष खत्रीले बताउनुभयो ।
गत वर्षको तुलना यस वर्ष पुरस्कार राशि बढाइएको उहाँले बताउनुभयो । प्रतियोगिताको उपाधि विजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले २५ हजार रुपैयाँसहित शिल्ड, मेडल तथा प्रमाणपत्र प्राप्त गर्नेछ । प्रतियोगिताको सर्वोकृष्ट खेलाडी, सर्वोकृष्ट व्याट्सम्यान र सर्वोकृष्ट बलरलाई पनि पुरस्कार प्रदान गरिने जनाइएको छ । प्रतियोगिता आयोजनाका लागि करिब ३ लाख ५० हजार रुपैयाँ खर्च हुने आयोजकको अनुमान रहेको छ ।
