जिन्दगीलाई प्रायः एउटा लामो यात्रासँग तुलना गरिन्छ । यो सफर न कुनै निश्चित गन्तव्यमा पुगेर अन्त्य हुन्छ न त यसको बाटो सधैँ सरल र सहज हुन्छ । जीवन एउटा यस्तो यात्रा हो, जसले हाम्रा पाइला–पाइलामा नयाँ मोडहरू, रहस्यहरू अनि कहिले मीठा, कहिले तिता अनुभवहरू पस्किन्छ ।
हरेक बिहानको सूर्य उदयले नयाँ सम्भावनाहरूको आगमन गर्छ । हरेक रातको अँध्यारोले भोलिपल्टको उज्यालोको आशा जगाउँछ । जीवनको यात्रा पनि यस्तै हुन्छ । कहिले काँडा बिच्छाएर हामीलाई रून बाध्य बनाउँछ, कहिले फूलको सुवासले मुटु प्रफुल्लित बनाउँछ ।
जीवनको सफरमा हामी धेरै गन्तव्यहरू पार गर्छौँ । बाल्यकाल, किशोरावस्था, युवावस्था, प्रौढावस्था र बुढ्यौली । प्रत्येक कालखण्डले आफ्नै विशेषता बोकेको हुन्छ । बाल्यकालमा जहाँ निर्दोष हाँसो हुन्छ, किशोरावस्था जहाँ सपनाको महलहरू बुन्न थाल्छन्, युवावस्था जहाँ जिम्मेवारीहरूको भार काँधमा आउँछ, अनि बुढ्यौली जहाँ सम्झनाहरूले मुटु भरिन्छ ।
जीवन यात्रामा हामीसँग सङ्गीहरू पनि हुन्छन् । हाम्रा आमाबुबा, साथीभाइ, प्रेमी–प्रेमिका, सन्तान र सहकर्मीहरू । यिनीहरू जीवनको यात्रालाई सजिलो बनाउने पात्र हुन् । कहिलेकाहीँ उनीहरू हामीसँग धेरै टाढा पुग्छन् तैपनि तिनको सम्झना हाम्रो हृदयको कुनामा बसिरहन्छ ।
जीवन एउटा पाठशाला पनि हो । यहाँ हरेक गल्तीले पाठ सिकाउँछ । हरेक असफलताले अर्को प्रयासका लागि प्रेरणा दिन्छ । जीवनको हरेक मोडले हामीलाई केही न केही सिकाइरहेको हुन्छ । कतिपय समय हामी ती पाठहरू बुझ्न नसक्ने अवस्थामा पनि हुन्छौँ ।
सपनाहरू जीवनको यात्राका नक्सा हुन् । यी नक्साले हामीलाई हिँड्नका लागि मार्ग देखाउँछ तर सपना मात्र देखेर यात्रा सकिँदैन । तिनलाई साकार पार्न मेहनत, धैर्य र निष्ठाको जरुरत पर्छ । जीवनको यात्रामा सबैभन्दा महत्वपूर्ण कुरा आत्मविश्वास हो । जबसम्म आत्मविश्वास हाम्रो साथमा हुन्छ तबसम्म कुनै पनि बाधा हामीलाई रोक्न सक्दैन । आत्मविश्वास भनेको यात्रामा बलियो जुत्ता जस्तै हो, जसले काँडाका बाटाहरू पार गर्न सहयोग गर्छ ।
तर, जीवनको यो यात्रामा कहिलेकाहीँ हाम्रा पाइला थाक्छन् । हामीलाई विश्राम चाहिन्छ । यो विश्राम भनेको हार मान्नु होइन, बरु अर्को कदम चाल्नका लागि शक्ति सङ्कलन गर्नु हो । जिन्दगीको यात्रा अन्तिम गन्तव्यमा पुगेर समाप्त हुन्छ तर यात्राको क्रममा गरिएका कामहरू, बाँडिएका खुसीहरू अनि अरूको जीवनमा छोडिएका प्रभावहरू भने कहिल्यै मेटिँदैनन् ।
यसैले जिन्दगीको यात्रालाई हरेक क्षण जिउनुहोस् । हरेक मोडलाई अपनाउनुहोस् । हरेक चुनौतीलाई स्वीकार गर्दै अघि बढ्नुहोस् किनकि जिन्दगी एउटा अनुपम सफर हो, जहाँ हरेक पाइला, हरेक क्षणले तपाईंलाई केही न केही शिक्षा दिन्छ । सधैँ सम्झनुहोस् । यो यात्रा तपाईंको मात्र होइन, तपाईंले छोडेका पदचिन्हहरूले अरूलाई पनि मार्ग देखाइरहेका छन् त्यसैले हरेक पाइला दृढताका साथ चाल्नुहोस् । जिन्दगीलाई डर होइन, हिम्मतले जिउनुहोस् किनकि अन्ततः यही साहसले तपाईंको कथालाई अमर बनाउँछ ।
