हेटौंडाः शिक्षा विकास तथा समन्वय इकाई मकवानपुरले शुक्रबार आयोजना गरेको जिल्लास्तरीय विज्ञान प्रदर्शनी प्रतियोगितामा कैलाश गाउँपालिकामा रहेको कालिका माध्यमिक विद्यालय प्रथम भएको छ । हेटौंडा–२ स्थित सिद्धार्थ माध्यमिक विद्यालयको सभाहलमा आयोजना गरिएको प्रतियोगितामा सहभागी ७ विद्यालयमध्ये कालिका माध्यमिक विद्यालय प्रथम भएको हो ।
प्रदर्शनीमा हेटौंडा–१६ स्थित जनप्रिय माध्यमिक विद्यालय द्वितीय, बकैया गाउँपालिकामा रहेको महेन्द्र माध्यमिक विद्यालय तृतीय र मकवानपुरगढी गाउँपालिकामा रहेको वंशगोपाल माध्यमिक विद्यालय सान्त्वना भएको इकाईका अधिकृत उन्नति ढकालले बताउनुभयो । प्रथम, द्वितीय, तृतीय र सान्त्वना हुने विद्यालयलाई क्रमशः ७ हजार, ४ हजार, ३ हजार र १ हजार रुपैयाँ नगदसहित पुरस्कृत गरिएको उहाँले जानकारी दिनुभयो ।
७ पालिकाबाट १÷१ विद्यालयले प्रतियोगितामा सहभागी जनाएका थिए । जिल्लाको मनहरी गाउँपालिका, बागमती गाउँपालिका र भीमफेदी गाउँपालिकाका विद्यालय भने सहभागी नभएको अधिकृत ढकालले बताउनुभयो ।
