हेटौँडा ः मकवानपुर प्रहरीले जिल्लाका विभिन्न स्थानमा लगाइएको ३ विगाह १० कठ्ठा लागुऔषध गाँजा फँडानी गरेको छ । शुक्रबार, शनिबार र आइतबार मकवानपुरको थाहा नगरपालिका र कैलाश गाउँपालिकाका विभिन्न स्थानमा लगाइएको ३ विगाह १० कठ्ठा क्षेत्रफलको लागुऔषध गाँजा फँडानी गरेको हो ।
जिल्ला प्रहरी कार्यालय मकवानपुरका अनुसार नेपाल प्रहरीका ११ जना र सशस्त्र प्रहरीका २५ जना गरी ३६ जनाको संयुक्त टोलीले थाहा र कैलाशमा लगाइएको लागुऔषध गाँजा खेती नष्ट गरेको हो । प्रहरीले थाहा–७ को चिसापानी, चल्तीदोभान, गैरीगाउँ, डाँडाबास र थाहा–८ को भोर्ले, मोरिया, खानीगाउँ, ऐँसेलुखर्क, दामगडेडाँडा लगायतको क्षेत्रहरुमा लगाइएको १० कठ्ठा गाँजा खेती फँडानी गरेको हो । प्रहरीले कैलाश–९ गैरीखेत, टिमुरेमा १ विगाह १० कठ्ठा र कैलाश–१० भालदमार, सालनी र बेतेघारीमा १ विगाह १० कठ्ठा गाँजा खेती फडानी गरेको प्रहरीले जनाएको छ ।
