हेटौँडा ः चोरीको मोटरसाइकलसहित मकवानपुर प्रहरीले २ जनालाई पक्राउ गरेको छ । चोरीको मोटरसाइकलसहित हेटौँडा–९, लामसुरेहाईटका २४ वर्षीय सविन मिजार र सर्लाही जिल्लाको बागमती गाउँपालिका–२ का २४ वर्षीय शरद कुमार श्रेष्ठलाई मकवानपुर प्रहरीले पक्राउ गरेको जनाएको छ ।
२०८० साल मंसिर ३० गते काठमाडौंको रविभवनमा पार्किङ गरिराखेको अवस्थामा चोरी भएको बागमती प्रदेश ०२–०२८ प ९३७१ नम्बरको केटीएम ड्युक मोटरसाइकलसँगै प्रहरीले सविनलाई शनिबार दिउँसो १ बजेको समयमा हेटौँडा–१०, बसपार्क क्षेत्रबाट पक्राउ गरेको जिल्ला प्रहरी कार्यालय मकवानपुरले जनाएको छ । मकवानपुर जिल्ला अदालतबाट ३ दिन म्याद अनुमति लिई हिरासतमै राखेर अनुसन्धान गरिरहेको प्रहरीले जनाएको छ । सविनले हेटौँडा–१९, बस्तीपुरमा सिमाने अटो पार्टस् समेत सञ्चालन गर्दै आएका छन् ।
यस्तै मिति २०८१ साल भदौ २९ गते ललितपुर जिल्लाको सातदोबाटोमा पार्किङ गरिराखेको प्रदेश २–०३–०१२ प ६२६८ नम्बरको पल्सर एनएस मोटरसाइकल चोरी भएको थियो । प्रहरीले शनिबार साँझ ५ बजेको समयमा चोरी भएको भनिएको मोटरसाइकलसहित हेटौँडा–८, कमाने किरनचोकबाट प्रहरीले शरद कुमार श्रेष्ठलाई पक्राउ गरिएको जनाएको छ । मकवानपुर जिल्ला अदालतबाट ५ दिनको म्याद अनुमती लिई थप अनुसन्धान कार्य भइरहेको प्रहरीले जानकारी दिएको छ ।
