हेटौँडाः आइतबार हुने स्थानीय तह उपनिर्वाचन अन्तर्गत हेटौंडा उपमहानगरपालिका वडा नम्बर–१२ मा हुने वडा अध्यक्ष पदको निर्वाचनको तयारी पूरा भएको छ । आइतबार बिहान हुने मतदानका लागि मतदानस्थल र मतदान केन्द्र निर्माणको तयारी सकिएको मुख्य निर्वाचन अधिकृतको कार्यालयले जनाएको छ ।
मुख्य निर्वाचन अधिकृतको कार्यालयका अनुसार हेटौंडा–१२ मा एक वडा अध्यक्ष पदका लागि आइतबार बिहान ७ बजेबाट मतदान सुरु हुनेछ । निर्वाचनका लागि हेटौंडा–१२ मा मतदान अधिकृत, सहायक अधिकृत र अन्य कर्मचारी खटाएर काम सम्पन्न गरिएको मुख्य निर्वाचन अधिकृत अवनी मैनाली भट्टराईले जानकारी दिनुभयो । उहाँका अनुसार मतदानस्थलमा मतपत्र र मतपेटिका तथा अन्य सामग्रीहरु पुर्याइसकेको छ भने मतदानका लागि सर्वदलीय बैठक बसेर आवश्यक निर्देशनहरु समेत गरिएको छ ।
हेटौंडा–१२ मा २०७९ को स्थानीय तहको निर्वाचनको तुलनामा उपनिर्वाचनमा १ हजार ५ सय ८८ मतदाता थपिएर कुल ८ हजार ५३ मतदाता रहेका छन् । जसमध्ये ४ हजार ४२८ जना पुरुष र ३ हजार ६२५ जना महिला र एक अन्य मतदाता रहेका छन् । निर्वाचनका लागि २ वटा मतदानस्थल तोकिएको छ । पूर्वतर्फ प्रतिभा आधारभूत विद्यालय सिक्रेनीमा र विष्णुज्योति आधारभूत विद्यालय भोर्लेमा मतदानस्थल कायम गरिएको छ । प्रतिभामा ५ वटा मतदान केन्द्र रहेको छ भने विष्णुज्योतिमा ४ वटा गरी कुल ९ वटा मतदान केन्द्र रहेका छन् ।
प्रदेश निर्वाचन कार्यालय हेटौँडाका प्रमुख हरिप्रसाद ढकालका अनुसार प्रतिभा मतदानस्थलमा ४ हजार ४२८ र विष्णुज्योतिमा ३ हजार ६२५ मतदाताले मतदान गर्नेछन् । निर्वाचनका लागि ९ वटा केन्द्रमा ४५ जना कर्मचारीहरु परिचालन गरिएको उहाँले जानकारी दिनुभयो । उहाँका अनुसार एउटा निर्वाचन केन्द्रमा ५ जना कर्मचारी र १ जना स्थानीय स्वयम्सेवक रहने व्यवस्था गरिएको छ ।
बाक्लो मात्रमा सुरक्षाकर्मी परिचालन
निर्वाचनका लागि जिल्ला सुरक्षा समितिले बाक्लो मात्रा सुरक्षाकर्मी परिचालन गरेको छ । प्रमुख जिल्ला अधिकारी तीर्थराज चिलुवालले आफैं स्थलगतरुपमा पुगेर सुरक्षा व्यवस्था कडाइ पारिएको बताउनुभयो । संख्यात्मक रुपमा ठूलो संख्यामा सुरक्षाकर्मी परिचालन गरेर निर्वाचनलाई भयरहित बनाउने काम भइरहेको उहाँले बताउनुभएको छ । मतदानस्थल, मतदाता, उम्मेदवारको सुरक्षालाई मध्येनजर गरेर सुरक्षाकर्मी परिचालन गरिएको उहाँको भनाई छ ।
४ वटा सुरक्षा निकायलाई परिचालन गरी निर्वाचनलाई भयरहित बनाउने काम भइरहेको उहाँले स्पष्ट पार्नुभयो । वडाको हरेक नाकामा प्रहरी परिचालन गरिएको छ भने पेट्रोलिङ मार्फत् वडाको सुरक्षाको व्यवस्था गरिएको प्रमुख जिल्ला अधिकारी चिलुवालले बताउनुभयो । उहाँले मतदातालाई भयरहित वातावरणमा मतदान गर्न आग्रह समेत गर्नुभएको छ ।
हेटौँडा–१२ को एक वडा अध्यक्ष पदका लागि १२ जना उम्मेदवार रहेका छन् । जसमध्ये दलबाट ९ जना र स्वतन्त्र ३ जना उम्मेदवार चुनावी मैदानमा रहेका छन् । दलबाट एमालेका राजेश नगरकोटी, कांग्रेसका अर्जुनप्रसाद तिवारी, माओवादी केन्द्रका रवि कुमार प्रधान, रास्वपाका आशावीर बल, राप्रपाका प्रेमबहादुर भोलन, जसपाका छविलाल वाइबा, मंगोल नेशनल अर्गनाइजेशकी दीपा लामा, नेमकिपाकी फूलमाया तितुङ र एकीकृत समाजवादीका बलराम बल उम्मेदवार रहेका छन् भने स्वतन्त्रबाट अर्जुन घलान, गीताकुमारी नेवार र छत्रप्रकाश अधिकारी चुनावी मैदानमा छन् ।
२०७९ मा सम्पन्न स्थानीय तहको निर्वाचनमा निर्वाचित भएका माओवादी केन्द्रका ललित बहादुर घलान जिल्ला समन्वय समिति मकवानपुरको प्रमुख बनेसँगै हेटौंडा–१२ को अध्यक्ष पद रिक्त रहेको थियो ।
