हेटौँडाः अज्ञात समूहले हानेको गोली लागेर उपचाररत मकवानपुरको बकैया गाउँपालिका–३, हात्तिसुडेस्थित बुद्ध माध्यमिक विद्यालयका प्रधानाध्यापक प्रेम बहादुर बोम्जनलाई बागमती गाउँपालिकाका शिक्षक, कर्मचारीले आर्थिक सहयोग गरेको छ । काठमाडौंमा उपचाररत बोम्जनलाई भेटेर शिक्षक महासंघ बागमती गाउँपालिकाका अध्यक्ष बसन्त राई नेतृत्वको शिक्षक–कर्मचारी समूहले प्रधानाध्यापक बोम्जनलाई सहयोग रकमको चेक हस्तान्तरण गरिएको छ ।
राईको सक्रियतामा संकलित २ लाख ४३ हजार ३ सय ९० रुपैयाँको चेक शनिबार काठमाडौंमा आफन्तकोमा बस्नुभएका बोम्जनलाई हस्तान्तरण गरिएको छ । सर्लाहीबाट सिन्धुली हुँदै मकवानपुर फर्कँदै गर्नुभएका बोम्जन र उहाँका भाइलाई गत कात्तिक २५ गते ३ जनाको समूहमा आएका अज्ञात समूहले सिन्धुली जिल्लाको हरिहरपुर गाउँपालिका–६ मा आक्रमण गरेका थिए । आक्रमणकारीले चलाएको गोली लागेर बोम्जनको मुखमा चोट लागेको छ ।
शिक्षक महासंघ बागमतीका अध्यक्ष बसन्त राईका अनुसार बागमती गाउँपालिका–१, माझगाउँका स्थायीबासी बोम्जन लामो समय बागमती गाउँपालिका–१ स्थित सूर्य माध्यमिक विद्यालयमा समेत अध्यापन गर्नु भएको र बागमती गाउँपालिकासँगको सम्बन्धकै कारण महासंघले शिक्षक, विद्यालय कर्मचारीसँग सहयोग संकलन गरेर बोम्जनलाई हस्तान्तरण गरेको बताउनुभयो । हालसम्म बोम्जनको स्वास्थ्यउपचारमा करिब ९ लाख रुपैयाँ खर्च भइसकेको र अझै ३ लाख खर्च हुने अनुमान गरिएको राईले बताउनुभयो ।
बोम्जनको स्वास्थ्य सुधार हुँदै आएको र उपचारका लागि काठमाडौंमै बस्नुपर्ने भएपछि उहाँ आफन्तको घरमा बस्दै आउनुभएको छ । बोम्जनमाथि आक्रमण गर्ने एकजनालाई प्रहरीले घटना भएकै दिन पक्राउ गरेको छ भने २ जना फरार छन् । शिक्षक संघ, संगठनले भने दोषीलाई कारवाही गर्न माग गर्दै सरकारको ध्यानाकर्षण गराउँदै आएको छ ।
