हेटौँडाः हेटौँडाबाट प्रकाशन हुँदै आएको समृद्ध समाज राष्ट्रिय दैनिकले पन्ध्रौं वार्षिकोत्सवको अवसरमा मिडियासम्बन्धमा बहस, माध्यमिक विद्यालयस्तरीय निबन्ध लेखन प्रतियोगिताको आयोजना गर्ने भएको छ । वार्षिकोत्सवको अवसरमा मकवानपुरको छापा पत्रकारिताको आयामका विषयमा बहस सञ्चालन गरिने सम्पादक सुरेश श्रेष्ठले जानकारी दिनुभएको छ ।
आगामी मंसिर १ गते हेटौँडामा हुने कार्यक्रममा बागमती प्रदेशका सञ्चार रजिष्ट्रार रेवती सापकोटा, अग्रज पत्रकार राममणि दाहाल, युवा पत्रकार सुनिता विष्टसँग बहस हुनेछ । बहसको सहजीकरण छवि अनित्यले गर्नुहुनेछ । आधुनिक सूचना प्रविधिको युगमा छापा पत्रकारिताको उपादेयता, प्रयोग, चुनौति र सम्भावनाका विषयमा रहेर बहस गरिने बताइएको छ । यस्तै ‘सामाजिक चेतनाका लागि समाचारपत्र’ शीर्षकमा माध्यमिक विद्यालय तहमा अध्ययनरत विद्यार्थीबीच निबन्ध लेखन प्रतियोगिताको आयोजना गरिएको सम्पादक श्रेष्ठले जानकारी दिनुभयो ।
नयाँ पुस्ताका रुपमा रहने माध्यमिक तहका विद्यार्थीबीच समाचारपत्रको औचित्य, महत्व र यसका विविध आयामका विषयमा सचेतना अभिवृद्धि हुने अपेक्षासहित निबन्ध प्रतियोगिताको आयोजना गरिएको उहाँको भनाइ छ । संस्थागत र सामुदायिक गरी दुबै विद्यालयबाट ५० भन्दा बढी विद्यार्थी सहभागी हुने सम्पादक श्रेष्ठले बताउनुभयो । निबन्ध प्रतियोगितामा प्रथम, द्वितीय, तृतीय र सान्त्वना हुनेले क्रमशः ३ हजार, २ हजार, १ हजार ५ सय र १ हजार रुपैयाँ नगदसहित प्रमाणपत्र प्राप्त गर्नेछ ।
वार्षिकोत्सवको अवसरमा समृद्ध समाज राष्ट्रिय दैनिकले पूर्व सहकर्मीलाई प्रशंसापत्र प्रदान गर्नुका साथै नवप्रवेशीलाई स्वागत बताइएको छ । यस्तै पठन संस्कृतिको विकासका लागि पनि आवश्यक कार्य गरिने सम्पादक श्रेष्ठले जानकारी दिनुभएको छ ।
