हेटौंडाः हेटौंडामा कारले २ वटा स्कुटरलाई ठक्कर दिँदा ५ जना घाइते भएका छन् । हेटौंडा उपमहानगरपालिका–५, सानोपोखरा चोकमा कारले २ वटा स्कुटरलाई ठक्कर दिँदा ५ जना घाइते भएका हुन् ।
चौघडाबाट हेटौंडाबजार तर्फ आउदै गरेको बा १३ च २००७ नम्बरको कारले सोही दिशा तर्फबाट आउदै गरेको ना ६४ प २८३६ नम्बरको स्कुटर, बा प्र–०३–००४६ प ०२५७ नम्बरको स्कुटर र पैदल यात्री समेतलाई ठक्कर दिएको थियो ।
शुक्रबार दिउँसो १ बजेर ४५ मिनेटको समयमा सानोपोखरा चोकमा उक्त कारले २ स्कुटर सहित पैदल यात्री बारा कोल्बी–१ बस्ने २३ वर्षीय दिप नारायण चौधरीलाई ठक्कर दिएको जिल्ला प्रहरी कार्यालय मकवानपुरका प्रवक्ता प्रहरीले नायव उपरीक्षक श्यामु अर्यालले जानकारी दिनुभयो ।
उहाँको अनुसार दुर्घटनामा ना ६४ प २८३६ को चालक हेटौंडा–५ बस्ने ३० वर्षीय नारायण तिमल्सिना, स्कुटर पछाडी सवार २७ वर्षीया अस्मिता सापकोटा, कारमा सवार सर्लाहि गोडाइता–५ की २८ वर्षीया रन्जिता कुमारी शाह, रन्जिताको ३ वर्षीय छोरा कुशल रौनियार घाइते भएका छन् ।
घाइतेहरुको हेटौंडा अस्पतालमा उपचार भइरहेको जिल्ला प्रहरी कार्यालय मकवानपुरका प्रवक्ता अर्यालले जानकारी दिनुभयो ।
