हेटौँडाः मकवानपुर प्रहरीले लागुऔषध गाँजासहित एकजनालाई पक्राउ गरेको छ । विशेष सुचनाको आधारमा ईलाका प्रहरी कार्यालय पालुङबाट खटिएको प्रहरी टोलीले ३ केजी २३६ ग्राम गाँजासहित मकवानपुरको कैलाश गाँउपालिका–२ का २३ वर्षीय तुलराम डिमडुङलाई पक्राउ गरिएको जिल्ला प्रहरी कार्यालय मकवानपुरले जनाएको छ ।
मंगलबार राती १० बजेर १० मिनेटको समयमा थाहा नगरपालिका–९, चित्लाङमा सवारी साधनहरु रोकी सुरक्षाजाँज गर्ने क्रममा थाहा नगरपालिकाको डाँडाबासबाट काठमाडौंतर्फ जादै गरेको ना ७ ख २५२ नम्बरको यात्रुबाहक बसमा सवार डिमडुङलाई प्रहरीले गाँजासहित पक्राउ गरेको हो । डिङडुङलाई नियन्त्रणमा लिई जिल्ला अदालत मकवानपुरबाट १० दिन हिरासतमै राखेर अनुसन्धान गर्न म्याद लिएको जनाएको छ ।
मकवानपुरमा प्रहरी प्रमुख फेरिएसँगै लागुऔषधसहित पक्राउ पर्ने, तस्करी गर्नेहरु पक्राउ पर्न थालेका छन् । मंगलबार नै प्रहरीले ६७ लाख रुपैयाँ बराबरको अवैध सुनसहित भारतीय नागरिकलाई पक्राउ गरेको थियो भने लागुऔषध ओनरेक्ससहित एक युवकलाई पक्राउ गरेको छ ।
