सन्दर्भः ४५औं विश्व पर्यटन दिवस
मकवानपुर जिल्ला देशकै मध्य भागमा रहेको जिल्ला हो । हेटौँडा देशकै सुन्दर सहरहरु मध्येको एक हो । मकवानपुर जिल्लामा पर्यटनको विकासमा हामी लामो समयदेखि काम गर्दै आएका छौं । मकवानपुर जिल्ला देशको मध्यभागमा भएको, हावापानी राम्रो भएकोले यहाँ पर्यटक आकर्षित हुन सक्छन् । यहाँ आएर २/३ दिन बस्नै पर्नेजस्तो आकर्षक क्षेत्र देखिन्न । एकदिनका लागि प्राकृतिक स्रोत, मठमन्दिरहरु छन् जसले पर्यटकलाई आकर्षित गर्न सक्छ ।
हामी निर्माणाधिन गौरिटार रंगशाला निर्माण सम्पन्न भएपछि मकवानपुर जिल्लाको पर्यटनमा टेवा पुग्ने अपेक्षामा छौं । गौरिटार रंगशालाको निर्माण कार्य सम्पन्न भइसक्दा खेल पर्यटनको सम्भावना राम्रो हुने अपेक्षा गरेका छौं । हेटौँडामा टाउन हलको पनि जरुरी छ । तीन हजार हाराहारी मान्छे अटाउने टाउन हल हुने हो भने देशभरका प्रतिनिधि आएर गोष्ठी, सेमिनार, भेला जस्ता कार्यक्रम हुने थिए । त्यसले पर्यटनको विकासमा सहयोग गर्छ ।
टाउन हल निर्माणमा निजी क्षेत्रले लगानी गर्न सक्ने अवस्था छैन । निजी क्षेत्रले लगानी गरेर आम्दानी गर्ने अवस्था नभएकोले टाउन हल निर्माणमा राज्यले नै लगानी गर्नुपर्छ । मकवानपुरको पर्यटन प्रवद्र्धनमा हामी व्यवसायीले उल्लेखनीय काम गर्न सकिरहेको छैनौं । ट्राभल टुरका योजना बनाउन सकेका छैनौं । छिमेकी मुलुक भारतको सिमावर्ती क्षेत्र रक्सौल लगायतका क्षेत्रबाट पर्यटक ल्याउन सक्छौं । पटन, मुजफ्फरपुरका नागरिकलाई आकर्षित गर्न सक्यौं भने पर्यटनको सम्भावना रहन्छ ।
हामी व्यवसायीले निजामति र शिक्षक सेवा आयोगको परीक्षामा सहभागी हुन आउनेलाई सक्दो सेवा गरेका छौं । होटलका आआफ्ना स्तरअनुसारको कोठाहरु छन् । हामीले सक्दो व्यवस्थापन गरेका छौं । सुपथ मूल्यमा सेवा प्रदान गरिरहेका छौं । यसमा केही गुनासाहरु छन् । त्यसलाई हामी व्यवसायीहरुले स्वीकार्ने र सुधार्ने प्रयास गरेका छौं ।
यतिबेला मकवानपुरका होटल व्यवसायी घाटामा छन् । आर्थिक मन्दीकै कारण व्यवसायी प्रत्यक्ष मारमा छन् । आज विश्व पर्यटन दिवसको अवसरमा भारतको सीमावर्ती क्षेत्रबाट आउने भारतीय पर्यटकलाई स्वागत गरेर मनाउँदै छौं । हामी अब हेटौँडामा बस्ने पाहुनालाई मनहरी हुँदै चितवन राष्ट्रिय निकुञ्ज, बारा जिल्ला क्षेत्रको भ्रमण गराउने र बसाई लम्ब्याएर सेवा प्रदान गर्दै आम्दानी, रोजगारीको अवसर बढाउने, लगानी बढाउने प्रयासमा छौं । म फेरि पनि भन्न चाहान्छु गौरिटार रंगशाला निर्माण सम्पन्न हुने र राज्यकै तर्फबाट सुविधासम्पन्न टाउनहल निर्माण गर्ने हो भने मकवानपुरमा पर्यटनको विकास गर्न सकिन्छ । पर्यटनमार्फत मकवानपुर जिल्लाको आर्थिक एवम् समग्र विकासमा योगदान बढाउन सकिन्छ । (खरेलसँग सम्पादक सुरेश श्रेष्ठले गर्नुभएको कुराकानीमा आधारित ।)
