हेटौँडाः गजल मञ्च मकवानपुरले आयोजना गर्ने नियमित गजलयात्रामा गजलकार दीपक गौतमले १० गजल प्रस्तुत गर्नुभएको छ । शनिबार गजल मञ्च मकवानपुरको २१७ औँ गजलयात्रामा गौतमले गजल वाचन गर्नुभएको हो ।
गजल मञ्च मकवानपुरका पूर्वअध्यक्षसमेत रहनुभएका गौतमले दुई चरणमा १० वटा गजल वाचन गर्नुभएको थियो । उहाँले सामाजिक विकृति विसंगति, वर्तमान भोगाई र केही शृङ्गारिक गजल वाचन गर्नुभयो । गौतमसँगै ४ जना नवसर्जकले पनि गजल वाचन गरेका थिए । गजलकार गौतमकै अग्रसरतामा प्रशिक्षित नवसर्जकले आफ्ना गुरुसँगै गजल वाचन गरेका हुन् ।
नवसर्जकको तर्फबाट अनसूया खनाल, प्राश्ना पौडेल, रुबस पराजुली र सामना रिजालले गजल वाचन गर्नुभएको हो । गजल मञ्च मकवानपुरले हरेक महिनाको पहिलो शनिबार नियमित गजलयात्राको आयोजना गर्दै आएको छ । मञ्चले पछिल्लो समय विद्यालयहरुमा पुगी गजल प्रशिक्षणको कार्यक्रम गरी नवसर्जक केन्द्रित शृङ्खलाहरुसमेत सञ्चालन गरिरहेको छ । गजल मञ्च मकवानपुरका अध्यक्ष केशव समर्पणको सभाध्यक्ष तथा अग्रज साहित्यकार निमेष निखिलको प्रमुख आतिथ्यमा कार्यक्रम भएको थियो ।
