हेटौँडाः मकवानपुरको बागमती गाउँपालिकाको प्रमुख प्रशासकीय अधिकृतमा ओम बहादुर दर्जी पदस्थापित हुनुभएको छ । शुक्रबार गाउँपालिकाका अध्यक्ष सर्केश घलानले दर्जीलाई पालिकाको प्रमुख प्रशासकीय अधिकृतको रुपमा स्वागत गर्नुभएको छ ।
प्रमुख प्रशासकीय अधिकृत दर्जीले शुक्रबार पालिकामा उपस्थित भएर कार्यभार सम्हाल्नुभएको छ । दर्जी सिन्धुली जिल्लाको मरिण गाउँपालिकाबाट सरुवा भएर आउनुभएको हो । दर्जी ३४ महिनादेखि मरिणको प्रमुख प्रशासकीय अधिकृतको रुपमा कार्यरत हुनुहुन्थ्यो । २०६९ सालमा निजामती सेवामा प्रवेश गर्नु भएका दर्जीले २०७४ सालदेखि विभिन्न स्थानीय तहहरुमा शाखा अधिकृतको रुपमा सेवा सुरु गर्नुभएको थियो । यसअघि बागमती गाउँपालिकाको निमिक्त प्रमुख प्रशासकीय अधिकृतको रुपमा झम्कनारायण घलानले दुई वर्षदेखि जिम्मेवारी सम्हाल्दै आइरहनुभएको थियो ।
