हेटौँडाः तेस्रो संस्करणको रोटरी मकवानपुर पिप्ले क्याम्पा राष्ट्रिय भेट्रान्स फुटबल प्रतियोगितामा साविक विजेता चितवन भेट्रान्सले विजयी सुरुवात गरेको छ । रोटरी क्लब अफ मकवानपुरको आयोजना, पिप्ले युवा क्लबको सहआयोजना तथा हेटौँडा उपमहानगरपालिकाको मुख्य सहयोगमा सुरु भएको प्रतियोगिताको उद्घाटन खेलमा चितवनले टाइब्रेकरमा जित निकालेको हो ।
चितवनले घरेलु टोली नागस्वती भेट्रान्स क्लबलाई ४–२ गोलले हराउँदै क्वार्टरफाइनलमा प्रवेश गरेको छ । नागस्वतीको तर्फबाट राजेन्द्र थापाले पहिलो हाफको १०औं मिनेटमा एक गोल गर्दै अग्रता दिलाएका थिए । पहिलो हाफको खेलसम्म १–० गोलले पछि परेको चितवनको तर्फबाट दोस्रो हाफको २३ औं मिनेटमा सूर्य नारायण श्रेष्ठले बराबरी गोल गरे । निर्धारित समय १–१ गोलको बराबरी भएपनि खेल टाइब्रेकरमा पुगेको थियो । टाइब्रेकरमा घरेलु टोली नागस्वतीको २ वटा प्रहार मात्र गोलमा परिणत भएको थियो । म्यान अफ द म्याच चितवनका गोलरक्षक राजु शाही घोषित भएका छन् ।
