हेटौँडाः हेटौँडा उपमहानगरपालिकाले शिक्षा दिवसको अवसरमा कविता प्रतियोगिता आयोजना गर्दैछ । नगरका सामुदायिक र निजी दुबै विद्यालयका विद्यार्थीको सहभागिता रहने गरी कविता प्रतियोगिता आयोजना गर्न लागेको उपमहानगरपालिकाको शिक्षा विकास महाशाखाले जनाएको छ ।
सोमबार एक सूचना जारी गर्दै उपमहानगरपालिकाले प्रतियोगितामा सहभागी हुन चाहनेले “सपनाको सहर हेटौँडा” शीर्षकमा कविता लेख्नुपर्ने जनाएको छ । “ज्ञान, विज्ञान, सीप, उद्यम र मौलिकताः साझेदारी र प्रणालीगत सक्षमता” भन्ने आदर्श वाक्यका साथ यस वर्षको शिक्षा दिवस मनाइँदैछ । प्रतियोगितामा सहभागी हुन चाहने विद्यार्थीले भदौ ३१ गतेसम्ममा कवितासहित नाम दर्ता गराउनुपर्ने जनाइएको छ ।
कविता प्रतियोगितामा प्रथम, द्वितीय, तृतीय र सान्त्वना हुनेले क्रमशः १० हजार, सात हजार, पाँच हजार र तीन हजार रुपैयाँ प्राप्त गर्नेछ । प्रतियोगितामा सहभागीले असोज २ गते कविता वाचन गर्नुपर्नेछ ।
