हेटौँडा: मकवानपुरको मनहरीमा बाघ मृत अवस्थामा फेला परेको छ । बिहिबार बिहान ३:१५ बजेको समयमा मनहरी गाउँपालिका-६ प्रतापपुरस्थित बल बहादुर राईको गोठमा बाघ मृत भेटिएको हो ।
बाघले राईको गोठमा रहेको भैंसीलाई आक्रमण गर्दा भैंसी घाइते भएको र सोहि गोठमा बाघ मृत अवस्थामा भेटिएको जिल्ला प्रहरी कार्यालय मकवानपुरले जनाएको छ ।
प्रहरी टोली र पर्सा वन्यजन्तु आरक्षण सुरक्षार्थ खटिएको मध्यवर्ती क्षेत्र पदमपोखरी सेक्टर लामिटार व्यारेकबाट नेपाली सेनाको टोली घटनास्थल पुगेको थियो । घटनास्थलको प्रारम्भिक अनुसन्धानबाट बाघ बुढो रहेकाले भैसिले हान्दा मरेको हुन सक्ने खुल्न आएको जिल्ला प्रहरी कार्यालय मकवानपुरका प्रहरी उपरीक्षक सीताराम रिजालले जानकारी दिनुभएको छ।
चितवन राष्ट्रिय निकुन्ज सुरक्षार्थ सेक्टर सौराह ब्यारेकबाट खटिएको नेपाली सेनाको टोलीले मृत बाघ अनुसन्धानका लागि जिम्मा लिएको उहाँले बताउनुभएको छ।
