हेटौंडाः बागमती प्रदेशकी सामाजिक विकासमन्त्री हरिप्रभा खड्गीले एसईईको पूरक (ग्रेडवृद्धि) परीक्षा भइरहेका केन्द्रहरुको निरीक्षण तथा अनुगमन गर्नुभएको छ । बुधबारबाट सुरु भएको एसईईको ग्रेडवृद्धि परीक्षा सञ्चालन भइरहेका बखत मन्त्री खड्गीले काठमाडौं, भक्तपुर र ललितपुरका ४ विद्यालयमा अनुगमन तथा निरीक्षण गर्नुभएको हो ।
निरीक्षणको क्रममा उहाँले विद्यालयको भौतिक तथा शैक्षिक अवस्थाको समेत अवलोकन गर्नुभएको छ । उहाँले सम्बन्धित विद्यालयका व्यवस्थापन समिति, प्रधानाध्यापक तथा शिक्षक र कर्मचारीहरुसँग अन्तरक्रियासमेत गर्नुभएको थियो ।
मन्त्री खड्गीले शिक्षा क्षेत्रको विकासलाई प्रदेश सरकारले प्राथमिकताका साथ अघि बढाएको र शिक्षाको गुणस्तर सुधार तथ विद्यार्थीहरुलाई प्रोत्साहन गर्ने उद्देश्यले निरीक्षण गरेको बताउनुभयो । सामुदायिक विद्यालयको स्तर सुधार गर्ने र नतिजामुखी शिक्षण सिकाइको अवधारणाअनुसार काम गर्ने निर्देशन मन्त्री खड्गीले दिनुभएको छ ।
निजी विद्यालयको तुलनामा सामुदायिक विद्यालयको नतिजा खस्कनुको कारणसहित गुणस्तर सुधारका लागि योजना निर्माण गरेर मन्त्रालयमा पेश गर्न उहाँले विद्यालयहरुलाई निर्देशन दिनुभएको छ । प्रदेश सरकार शिक्षाको विकास र विद्यार्थीहरुको भविष्यप्रति गम्भीर भएर अघि बढेको उहाँको भनाइ छ ।
उहाँका अनुसार निजी विद्यालयले कम स्रोतमा पनि उत्कृष्ट नतिजा हासिल गर्न सक्ने तर, सामुदायिक विद्यालयमा पारिश्रमिक तथा अन्य स्रोत पर्याप्त हुँदा पनि नसक्नुको अवस्थाका विषयमा सबै पक्षले ध्यान दिनुपर्ने हुन्छ । गुणस्तरीय शिक्षा दिने विषयमा सम्बन्धित विद्यालयका शिक्षकहरुले नै अपनत्व लिएर अभिभावकत्व बहन गर्नुपर्ने उहाँको भनाइ छ । पठनपाठनको प्रवृत्ति सुधार गरेर काम गर्न र विद्यार्थीको भविष्यमाथि खेलवाड नगर्न उहाँले निर्देशन दिनुभयो ।
अनुगमनका क्रममा विद्यालयका प्रधानाध्यापकहरुले शिक्षकहरुको क्षमता विकास, तालिम तथा प्रविधिको प्रयोग तथा सुविधायुक्त ल्याब र भौतिक संरचना निर्माण गर्नुपर्ने आवश्यकता रहेकाले सरकारले त्यसतर्फ ध्यान दिनुपर्ने बताएका थिए । अनुगमन टोलीमा प्रदेशसभा सदस्य सुरेश श्रेष्ठ, शिक्षा निर्देशनालय बागमती प्रदेशका महानिर्देशक दीपेन्द्र सुवेदीलगायतको सहभागिता रहेको थियो ।
