हेटौंडाः काठमाडौं महानगरपालिकाको दशरथ रंगशालमा हुन लागेको १६ औं काठमाडौं म्याराथन प्रतियोगिताका लागि ४६ जना खेलाडीहरु किकफिट सर्किट प्रशिक्षणमा सहभागी भएका छन् । आगामी असोज महिनाको १२ गतेबाट सुरु हुने काठमाडौं म्याराथन प्रतियोगितामा सहभागी हुने हेटौंडा उपमहानगरपालिका भित्रका ४६ जना खेलाडीहरु निःशुल्क किकफिट प्रशिक्षणमा सहभागी भएका हुन् । प्रशिक्षणमा सहभागी भएका खेलाडीहरुलाई मुख्य प्रशिक्षक राजाराम पोखरेलले प्रशिक्षण दिइरहनुभएको छ । प्रशिक्षक पोखरेलले साँझ साढे ५ बजेदेखि साढे ६ बजेसम्म प्रशिक्षण दिने गरेको बताउनुभयो ।
प्रशिक्षणमा सहभागी खेलाडीहरुलाई साताको ५ दिन प्रशिक्षण दिने र शनिबार हेटौंडाको क्याम्पाडाँडामा दौडाउने गरेको उहाँले बताउनुभयो । असार महिनाबाट सुरु गरेको किकफिट प्रशिक्षणमा हेटौंडा नगरभित्रका ५० जना खेलाडीहरु सहभागी भएका थिए । अहिले ४ जना खेलाडीहरु प्रशिक्षणमा सहभागी नभएको प्रशिक्षक पोखरेलले बताउनुभयो । प्रशिक्षणमा ३६ जना छात्रा र १० जना छात्र खेलाडीहरु सहभागी हुने गरेको उहाँले बताउनुभयो ।
भदौ महिनासम्म सञ्चालन हुने प्रशिक्षणमा ४६ जना खेलाडीहरुबाट २० जनालाई छनोट गरेर काठमाडौं पठाइने उहाँले बताउनुभयो । उहाँका अनुसार खेलाडीहरुले राम्रो प्रतिभा प्रस्तुत गरेमा र रुचि देखाएमा सहभागी सबै खेलाडीलाई छनोट गरेर काठमाडौं पठाइने पनि योजना रहेको छ ।
एनआरएस स्पोर्टस् फाउण्डेसनको आयोजना तथा इन्ड्राइभको सहकार्यमा हरेक वर्ष १२ वर्षभन्दा अधिक उमेर समूहका खेलाडीहरुलाई लक्षित गरेर प्रतियोगिताको आयोजना गर्ने गरेको उहाँले बताउनुभयो । खेलप्रति रुचि भएका र धावक बन्न इच्छा भएका खेलाडीहरुलाई लक्षित गरेर नेपालको ८ वटा सहरहरुमा किकफिट प्रशिक्षण सञ्चालन हुने गरेको छ । जसअन्तर्गत हेटौंडाका खेलाडीलाई प्रतियोगितामा सहभागी गराउनका लागि पोखरेलले नेतृत्व गरेर प्रशिक्षण दिइरहनु भएको हो ।
नेपालको काठमाडौं, पोखरा र पाटन महानगरपालिका, बुटवल र हेटौंडा उपमहानगरपालिका एवम् मध्यपुर थिमी र कीर्तिपुर नगरपालिकाका छात्रा र छात्र खेलाडीहरुको प्रतियोगितामा सहभागिता रहनेछ । गतवर्ष भएको १५ औं संस्करणको म्याराथन प्रतियोगितामा हेटौंडा उपमहानगरपालिकाबाट १५ जना खेलाडीहरु सहभागी भएका थिए । प्रतियोगितामा १३ जना छात्रा र २ जना छात्र खेलाडीहरु सहभागी भएको बताइएको छ ।
साताको ५ दिन सञ्चालन हुने प्रशिक्षणमा बालबालिका एवम् धावकलाई सम्भावित चोटपटकबाट बच्नका लागि सिकाउने गरिएको छ । प्रशिक्षणको माध्यमबाट खेलाडीहरुको मनोबल बढ्ने, स्वस्थ हुने, आत्मबल बढ्ने, प्रतिस्पर्धा गर्न सक्ने क्षमता बढ्ने तथा विभिन्न प्रकारको नकारात्मक कामबाट बच्ने प्रशिक्षक पोखरेलले विश्वास व्यक्त गर्नुभएको छ ।
