हेटौंडाः बारा प्रहरीले करिब ६५ लाख रुपैयाँ बराबरको अवैध सामान नियन्त्रणमा लिएको छ । मंगलबार राति ११ बजेको समयमा प्रहरीले ६५ लाख रुपैयाँ बराबरको अवैध सामान नियन्त्रणमा लिएको जिल्ला प्रहरी कार्यालय बाराले जानकारी दिएको छ ।
इलाका प्रहरी कार्यालय बाराका प्रहरी नायब निरीक्षक त्रिभुवनलाल साहको कमाण्डमा खटिएको प्रहरी टोलीले अवैध सामान बरामद गरेको हो । जीतपुर सिमरा उपमहानगरपालिका वडा–२१, अमलेखगञ्जबाट प्रहरीले ६४ लाख ५८ हजार २ सय ७४ रुपैयाँ बराबरको स्रोत नखुलेको इलेक्ट्रोनिक गुड, लिपिष्टिक र वाइरिङको सामानहरु नियन्त्रणमा लिएको बारा प्रहरी कार्यालयले जनाएको छ । प्रहरीले ट्रकलाई नियन्त्रणमा लिएर आवश्यक कारबाहीका लागि राजश्व अनुसन्धान कार्यालय पथलैया बारा पठाइएको छ ।
