हेटौंडाः बागमती प्रदेशका श्रम रोजगार तथा यातायात मन्त्री लक्ष्मण लम्सालले प्रदेश सरकार रोजगारी सृजनाको कार्यक्रम अघि बढेको बताउनुभएको छ । सरकारले रोजगारी सृजनाको लागि ठोस कार्यक्रम सहित अघि बढ्ने बजेटमा व्यवस्था गरेको उहाँले बताउनुभयो ।
प्रदेशसभाको बिहीबार बसेको बैठकमा सरकारको आगामी आर्थिक वर्षको बजेट माथि उठेको प्रश्नको जवाफ दिँदै मन्त्री लम्सालले रोजगार मेला संचालन गरी श्रमिक र मालिकको भेट हुने वातावरण निर्माण गर्ने तयारी रहेको बताउनुभयो । सरकारले राजस्व वृद्धिका लागि नीतिगत सुधार गरेर दायरा वृद्धिमा काम गर्ने तयारी गरेको उहाँको भनाई छ ।
राइड सेयरिङलाई कानुनी दायरामा ल्याएर नियमन गर्न तथा राजस्व वृद्धिमा नीतिगत सुधारको काम गर्ने तयारी रहेको उहाँले बताउनुभयो । उहाँका अनुसार मन्त्रालयले चालु आर्थिक वर्षको जेठसम्ममा १० अर्व रुपैयाँ राजस्व संकलन गरेको छ ।
‘श्रम रोजगार तथा यातायात मन्त्रालय राजस्वको संकलनको गर्ने महत्वपूर्ण मन्त्रालय हो । मन्त्रालयले जेठसम्ममा १० अर्व राजस्व संकलन गरेको छ । चालु आर्थिक वर्षमा ९० प्रतिशत राजस्व संकलन हुने अवस्था छ । श्रम नीति निर्माण भइसकेको छ । संघीय सरकारसंगको समन्वयमा ऐन निर्माण अघि बढ्ने तयारी छ ।’ उहाँले भन्नुभयो ।
सरकारले यातायात सेवालाई सहज बनाउन अनलाइन र डिजिटल प्रविधिको प्रयोग गर्ने सरकारको तयारी रहेको मन्त्री लम्सालले बताउनुभयो । सार्वजनिक सवारिको भाडा भुक्तानीलाई नगद रहित बनाउने, मातहतका कार्यालयहरु डिजिटल बनाउने काम सरकारले गरिरहेको उहाँको भनाई छ । प्रदेश सरकारले ज्यालादारी र अस्थायी कर्मचारीलाई सामाजिक सुरक्षामा कोषमा जोड्ने काम भइरहेको उहाँले बताउनुभयो ।
‘प्रदेश सरकारले अटोल्याण्ड निर्माणको काम अघि बढाएको छ । सवारी मर्मतलाई व्यवस्थित गर्न अटोल्याण्ड स्थापनाको कन्सेप्ट अघि बढेको छ । इलिक्ट्रिक सवारी साधन सहित हाइड्रोजन ग्यासको प्रयोगबाट सवारी संचालनको लागि संभाव्यता अध्ययनको तयारी सरकारको रहेको छ । गृहणी महिलाहरुका लागि सिपमुलक तालिम दिएर उद्यमशीलतामा जोड्न सरकारले ४८ लाख रुपैयाँ बजेट लिएर कार्यक्रम अघि बढाएको छ ।’ मन्त्री लम्सालले भन्नुभयो ।
