हेटौँडाः राप्रपा बागमती प्रदेश संसदीय दलका नेता उद्धव थापाले बागमती प्रदेश सरकारले आगामी आर्थिक वर्षका लागि ल्याएको बजेट पक्षपाति ढङ्गबाट आएको बताउनुभएको छ । उहाँले बजेटले नागरिकहरुको अपेक्षालाई समेट्न नसकेको र मन्त्रीको मनोमानी ढंगबाट कार्यक्रमहरु समावेश गरिएको बताउनुभयो ।
मंगलबार आगामी आर्थिक वर्षको लागि विनियोजित बजेटमाथिको छलफलका क्रममा बोल्नुहुँदै राप्रपाका सांसद थापाले प्रदेश सरकारले यस पटक पनि पक्षपाति ढङ्गबाट बजेट ल्याएको बताउनुभयो । सरकारमा रहेका मन्त्री र सांसदहरुको क्षेत्रमा मात्र बढी बजेट विनियोजन गरेको भन्दै उहाँले आपत्तीसमेत जनाउनुभयो ।
‘समानपुपातिक र समावेशीका आधारमा बजेट नल्याएर प्रदेश सरकारले अहिलेको बजेट धादिङ, चितवन, मकवानपुर र सिन्धुपाल्चोकमा मात्र बढी केन्द्रित भएको उहाँले आरोप लगाउनुभयो । उहाँले स्वदेशमा रोजगारी सिर्जना गर्ने खालको बजेट नआएको पनि बताउनुभयो ।
‘प्रदेश सरकारको अहिलेको यो बजेटले युवाहरुलाई मुलुकमा नबस्नुस्, विदेश जानुस्, रेमिटन्स पठाउनुस्, शासन गर्ने भत्ता सुविधा लिने र गाडीघोडा चढ्ने हामी हो भन्ने खालको आएको छ ।’ उहाँले भन्नुभयो ।
सरकारले प्रदेशसभालाई उपेक्षा गरेको उहाँको भनाई छ । बजेटमाथि छलफलका बेला पनि सदनमा उपस्थित हुन नसक्ने मन्त्रीले जिम्मेवारीबाट मार्ग प्रसस्त गर्न उहाँले माग गर्नुभयो । उहाँले छिटो जसरी भएपनि बजेट पास गर्नुपर्छ भन्ने गलत सोच सरकारको रहेको भन्दै राम्रोसँग छलफल हुनुपर्ने बताउनुभयो ।
