हेटौँडाः पूर्व–पश्चिम राजमार्ग अन्तर्गत हेटौँडा–१५, रातोमाटेबाट मकवानपुर प्रहरीले लागुऔषध गाँजासहित १ जनालाई पक्राउ गरको छ । पक्राउ पर्नेमा धनुषा जिल्ला लक्ष्यनिया गाउँपालिका–६, बस्ने २८ वर्षीय मोहम्द मुस्ताख राइन रहेको बागमती प्रदेश प्रहरी कार्यालय हेटौँडाले जानकारी दिएको छ ।
बिहीबार हेटौँडाबाट पथलैयातर्फ जाँदै गरेको ना.७ ख १०५२ नम्बरको बसलाई सुरक्षा जाँच गर्दा बसमा सवार मोहम्दको साथबाट लागुऔषध गाँजा बरामद गरेको थियो । प्रहरीले मोहम्दको साथबाट ३ किलो १ सय ७० ग्राम गाँजा बरामद गरेको जनाएको छ । लागुऔषध गाँजासहित मोहम्दलाई नियन्त्रणमा लिई थप अनुसन्धानका लागि जिल्ला प्रहरी कार्यालय मकवानपुर लगिएको प्रहरीले जानकारी दिएको छ ।
