हेटौँडाः बागमती प्रदेश सभामा प्रमुख प्रतिपक्षी दल नेपाली काँग्रेसको दलका नेता बहादुर सिं लामाले बजेट पुनर्लेखन नभएसम्म प्रदेश सभा सञ्चालन हुन नसक्ने चेतावनी दिनुभएको छ । प्रदेश सरकारको आगामी आर्थिक बर्षको बजेट माथिको छलफल गर्न बिहिबार दिउँसो बसेको प्रदेशसभाको बैठकमा बोल्नुहुँदै नेता लामाले बजेट अस्पष्ट र सन्तुलित नभएकाले पुनर्लेखनको माग गर्नुभएको हो ।
नेता लामाले सरकारले बजेटमा चालु खर्चमा अर्थ विविधको १ अर्ब बढी बजेट राखिको भन्दै असन्तुष्टि व्यक्त गर्नुभयो । बजेटमा आर्थिक अराजकता देखिएको उल्लेख गर्नुहुँदै वक्तव्य र कार्यक्रम पुस्तिकामा बजेटको आकार नै फरक रहेकाले बजेट स्वीकार गर्न नसकिने उहाँको भनाई छ ।
‘बजेट कार्यक्रमको पीडीएफ फाइल र कार्यक्रम पुस्तिका नै परिवर्तन गरिएको छ । वक्तव्यमा ६४ अर्ब ५४ करोड रुपैयाँको बजेट ल्याइएको छ । कार्यक्रम पुस्तिकामा ६६ अर्बको कार्यक्रम कसरी आयो ? सरकारले सांसदको आँखामा छारो हाल्ने काम गरिरहेको छ’, लामाले भन्नुभयो, ‘सरकार छल–कपट गरेर जनता छक्याउन केन्द्रित भएको छ । आर्थिक मामिला मन्त्रालय नियमन गर्ने हो कि विकासे मन्त्रालय ? अर्थ विविधमा दोहोरो बजेट राखिएको छ ।’
सरकारले प्रदेश सभालाई नै असक्षम र असफल बनाउने काम गरिरहेको उहाँको जीकिर छ । आर्थिक अनुशासन र सुशासनको विषयलाई बेवास्ता गर्दै सरकारले बजेट ल्याएको उहाँले आरोप छ । बजेटमा आय र व्ययको हिसाब समेत मिलाउन नसकेको, नीति तथा कार्यक्रमको तरतम्य र बजेटको प्राथमिकता नै निर्धारण हुन नसकेको, बजेटले आर्थिक, सामाजिक, भौगोलिक विषयलाई सन्तुलित गर्न नसकेको उहाँको भनाई छ ।
‘प्रदेशको आर्थिक वृद्धिदर ६ प्रतिशत अनुमान गरिएकोमा १.८ प्रतिशत मात्र रहेको छ । जुन अन्य प्रदशेको तुलनामा सबैभन्दा कम रहेको छ । प्रदेश सरकारको कार्यक्रम प्रभावकारी नहुँदा आर्थिक वृद्धिदर समेत कम भएको हो’, लामाले भन्नुभयो । सरकारले ल्याएको अस्पष्ट बजेटमा १ लाख र ५ लाखका योजना समावेश गरेर पैसा छर्ने काम गरेको उहाँले बताउनुभयो । साना÷साना योजनामा बटेज हाल्दा कार्यान्वयन र नियमनमा समस्या हुने भन्दै उहाँले ध्यानाकर्षण गराउनुभएको छ ।
