हेटौंडाः मकवानपुर जिल्लाको मनहरीमा शनिबार बेलुका ट्रकले मोटर साइकललाई ठक्कर दिंदा घाईते भएका एक व्यक्तिको उपचारको क्रममा मृत्यु भएको छ । दुर्घटनामा घाइते भएका मोटर साइकल चालक हेटौंडा ८ कमानेका ४५ बर्षीय दिनेश कार्कीको नया मेडिकल कलेज चितवनमा उपचारको क्रममा मृत्यु भएको प्रहरीले जनाएको छ ।
शनिबार बेलुका साढे ७ बजे मनहरी गाउँपालिका ६ नयाँ बजार स्थित पुर्व पश्चिम राजमार्गमा हेटौडाबाट चितवनतर्फ जादै गरेको ना.५ ख ७७२१ नम्बरको ट्रकले बिपरित दिशा तर्फबाट आउँदै गरेको बा.प्र.–०३–००४ प ६९७३ नम्बरको बुलेट मोटर साइकललाई ठक्कर दिएको थियो । सो दुर्घटनामा घाइते कार्कीको टाउको र शरिरको बिभिन्न भागमा चोट लागी उपचारको लागि नया मेडिकल कलेज चितवन तर्फ पठाइएकोमा उपचारको क्रममा करिब १० बजे डाक्टरले मृत घोषणा गरेका थिए ।
ट्रक चालक बारा जिल्ला जितपुर सिमरा उपमहानगरपालिका १ पथलैया बस्ने ४२ बर्षीय सन्तोष धिताल इलाका प्रहरी कार्यालय मनहरीको नियन्त्रणमा रहेको प्रहरीले जनाएको छ ।
