हेटौँडाः पूर्व–पश्चिम राजमार्ग अन्तर्गत हेटौँडा–१५, रातोमाटे चेकपोष्टबाट मकवानपुर प्रहरीले लागुऔषध गाँजासहित १ जनालाई पक्राउ गरेको छ । पक्राउ पर्नेमा मकवानपुरको कैलाश गाउँपालिका–१० का ४० वर्षीय पाल्साङ मुक्तान रहेको बागमती प्रदेश प्रहरी कार्यालय हेटौँडाले जानकारी दिएको छ ।
बुधबार बिहान १० बजेको समयमा हेटौँडाबाट पथलैयातर्फ जाँदै गरेको ना ५ ख ५२६७ नम्बरको बसलाई रोकी सुरक्षाजाँच गर्दा बसमा सवार मुक्तानको साथबाट ५ किलो लागुऔषध गाँजा बरामद गरेको थियो । लागुऔषध गाँजासहित मुक्तानलाई नियन्त्रणमा लिई अनुसन्धानका लागि जिल्ला प्रहरी कार्यालय मकवानपुर लगिएको र बसलाई गन्तव्यतर्फ पठाएको छ ।
