हेटौँडाः सिन्धुली जिल्लाको दुधौली नगरपालिका–९ स्थित दुधौलीमा मोटरसाइकल दुर्घटनामा घाइते भएका एक जनाको मृत्यु भएको छ । मृत्यु हुनेमा दुधौली–५ का ३५ वर्षीय रोशन अधिकारी रहेको बागमती प्रदेश प्रहरी कार्यालय हेटौँडाले जनाएको छ ।
सोमबार दिउँसो २ बजेर २५ मिनेटको समयमा अधिकारीले चलाएको बा ३८ प ५९५५ नम्बरको पल्सर मोटरसाइकलले सडक छेउमा पिकअप गाडीबाट सामान लिँदै गरेको अवस्थामा दुधौली–१४ की २३ वर्षीया रस्मिता सुनारलाई ठक्कर दिएको थियो । सुनारलाई ठक्कर दिएपछि मोटरसाइकल अनियन्त्रित भएर पल्टिँदा चालक अधिकारी गम्भीर घाइते भएका थिए । घाइते चालक अधिकारीलाई उपचारका लागि उदयपुरस्थित कटारी अस्पतालमा लगिएकोमा उपचारको क्रममा मृत्यु भएको हो । मोटरसाइकलको ठक्करबाट घाइते सुनारको दुधौलीस्थित हेम्स हस्पिटलमा उपचारका लागिएको थियो । सुनवारको स्वास्थ्य अवस्था मध्यम रहेको जनाएको छ ।
