हेटौँडाः हेटौँडामा एकल गायन प्रतियोगिता हुने भएको छ । आँचल साहित्य कला पुञ्ज मकवानपुरको आयोजना तथा हेटौँडा उपमहानगरपालिकाको आर्थिक सहयोगमा वृहत् साहित्यक साँस्कृतिक कार्यक्रमअन्तर्गत् आउँदो शनिबार विद्यालयस्तरीय एकल गायन प्रतियोगिता हुने भएको हो ।
प्रतियोगिता हेटौँडा–४ स्थित हेटौंडा पार्टी प्यालेसमा हुनेछ । गायन प्रतियोगितामा कक्षा १ देखि १२ कक्षासम्मका विद्यार्थीहरुले सहभागिता जनाउन पाउनेछन् । प्रतियागितामा सहभागी भएका प्रतियोगीहरुले सन्देशमूलक गीत गाउनुपर्नेछ । प्रतियोगितामा सहभागी हुनका लागि प्रतियोगीहरुले बिहीबारसम्म आफ्नो नाम दर्ता गराइसक्नुपर्ने जनाइएको छ ।
प्रतियोगितामा एउटा विद्यालयबाट २ जना विद्यार्थीहरुले सहभागिता जनाउन पाउनेछन् । प्रतियोगितामा गायन सँगसँगै स्रष्टा सम्मान, बहस र रचना वाचन कार्यक्रम पनि हुने जनाइएको छ । प्रतियोगितामा प्रथम, द्वितीय, तृतीय र सान्त्वना हुनेहरुले क्रमशः ८ हजार रुपैयाँ, ६ हजार रुपैयाँ, ४ हजार रुपैयाँ र २ हजार रुपैयाँसहित प्रमाणपत्र प्राप्त गर्नेछन् ।
