हेटौँडाः हिमालयन राइडर्स सोसाइटीको आयोजनामा भएको प्रथम यु–१६ जिल्लास्तरीय साइक्लिङ प्रतियोगितामा आयुष दास प्रथम भएका छन् । शनिबार हेटौँडा–४ स्थित हुप्रचौरबाट सुरु भएको प्रतियोगितामा दासले ५ मिनेट २७ सेकेन्डमा निर्धारित ३ किलोमिटर दूरी पूरा गरेर प्रथम हुन सफल भएका हुन् ।
निर्धारित दूरी ५ मिनेट ४४ सेकेन्ड पार गर्दै अनमोल दास द्वितीय, ५ मिनेट ४७ सेकेण्डमा पार गर्दै रिजन फुयाँल तृतीय हुन सफल भए भने बरुण श्रेष्ठले ५ मिनेट ४८ सेकेन्डमा दौड पूरा गर्दै चौथो भए । यस्तै सोहन अग्रवालले ५ मिनेट ४९ सेकेन्डमा दूरी पार गर्दै पाँचौ भएका छन् । प्रतियोगितामा प्रथम, द्वितीय, तृतीय र सन्त्वना हुने दुई जनाले क्रमशः ५ हजार रुपैयाँ, ३ हजार रुपैयाँ, २ हजार रुपैयाँ र एक–एक हजार रुपैयाँसहित प्रमाणपत्र प्राप्त गरेका छन् ।
नगर खेलकुद विकास समितिका अध्यक्ष रविन्द्रप्रसाद घिमिरेको प्रमुख आतिथ्यमा पुरस्कार वितरण कार्यक्रम भएको हो । पुरस्कार वितरण कार्यक्रममा सशस्त्र प्रहरीको १४ गण प्रमुख ज्ञान प्रसाद भुर्तेल, मकवानपुर जिल्ला साइक्लिङ संघका अध्यक्ष संगीत श्रेष्ठ र हेटौँडा राईडर्स क्लबका कोषाध्यक्ष वीरेन्द्र बज्राचार्यको आतिथ्य रहेको थियो । प्रतियोगितामा २६ जना खेलाडीहरुको सहभागिता रहेको थियो । मकवानपुर जिल्लामा साइकल चलाउने बानीको विकास गर्न, साइक्लिङ खेलप्रतिको रुचि अभिवृद्धि गर्न प्रतियोगिताको आयोजना गरेको आयोजकले जनाएको छ ।
