हेटौंडाः निर्वाचन आयोग बागमती प्रदेश कार्यालयले मकवानपुरमा मतदाता नामावली अद्यावधिक तथा अन्तिम नामावली प्रकाशन गर्ने भएको छ । मंगलबार जिल्ला प्रशासन कार्यालय मकवानपुरको सभाहलमा भएको कार्यक्रममा प्रदेश निर्वाचन कार्यालयका प्रमुख ताराप्रसाद रेग्मीले फागुन २८ गते आयोगको वेबसाइटमा मातदाता नामावली प्रकाश गरिने बताउनुभयो ।
रेग्मीले फागुन २८ गतेदेखि चैत्र २२ गतेसम्म जिल्लाभित्रका सबै पालिकाका वडा कार्यालयमा कार्यक्रम सञ्चालन गरिने जानकारी दिनुभयो । कार्यक्रममा मुख्य भूमिका निर्वाचन कार्यालय र स्थानीय तहअन्तर्गत् वडा कार्यालयको रहनेछ ।
फागुन २८ गते मतदाता नामावली प्रकाशन, २९ गतेदेखि चैत्र ५ गतेसम्म अनलाइन, निर्वाचन कार्यालय वा वडा कार्यालयमा त्रुटी सच्याउन निवेदन दिने, मतदाता नामावलीमा कसैले झुटा विवरण दिई नामावलीमा नाम समावेश गरेको भएमा सोको विरोधमा उजुरी दिन सकिनेछ । २९ गतेदेखि चैत्र ५ गतेसम्म नै कुनै मतदाताको नाम एकभन्दा बढी स्थानमा समावेश भएमा एक स्थानमा मात्र कायम गर्न निवेदन दिने र मृत्यु भएको वा नागरिकता त्याग गरेका मतदाताको नाम मतदाता नामावलीबाट हटाउनका लागि सूचना दिन आयोगले अनुरोध गरेको छ ।
सोही अवधिमा वडा कार्यालयमा दर्ता भएका निवेदन प्राप्त गर्ने, बसाइँसरी अन्यत्र गएका वा मृत्यु भएका मतदाताको विवरण स्थानीय पञ्जिकाधिकारीबाट र नागरिकता त्याग गरेका मतदाताको विवरण जिल्ला प्रशासन कार्यालयबाट प्राप्त गर्ने र सूचना तथा निवेदन प्राप्त नभएता पनि कुनै मतदाता बसाइँसरी गएको, मृत्यु भएको, नागरिकता त्याग वा रद्द भएको प्रमाणित विवरण प्राप्त गर्ने कार्यतालिका रहेको छ । चैत्र ६ गतेदेखि ८ गतेसम्म निर्वाचन कार्यालयमा उजुरी परेको मतदातालाई प्रमाणसहित सफाइको मौका दिइने भएको छ । यस्तै, चैत्र ९ गतेदेखि १२ गतेसम्म निर्वाचन कार्यालयमा मतदाता नामावलीबाट नाम हटाउने सम्बन्धमा आवश्यक छानबीन गरी प्रमुख नामदर्ता अधिकारीले त्रुटी सच्याउने र नाम हटाउनेलगायत कानुनबमोजिम निर्णय गरिनेछ ।
चैत्र १२ गतेदेखि १५ गतेसम्म निर्वाचन कार्यालय र वडा कार्यालयमा नाम हटाइएको सूचना प्रकाशन गर्ने र फरक जिल्लामा दोहोरो नाम परेको सम्बन्धमा निवेदन प्राप्त भए सोको छुट्टै विवरण तयार गरी जिल्लामा अद्यावधिक भएको डाटासँगै आयोगमा पठाउन सकिनेछ । यस्तै, चैत्र २२ गते अन्तिम मतदाता नामावली प्रकाशन गरिने रेग्मीले बताउनुभयो । अद्यावधिकको लागि नयाँ नाम दर्ता नहुने तर सच्चाउने काममात्र हुने रेग्मीले बताउनुभयो ।
आयोगले फागुन १३ गतेदेखि नयाँ नाम दर्ताको काम बन्द गरेका छ । कार्यक्रममा जिल्ला प्रशासन कार्यालयका प्रमुख सूर्यप्रसाद सेढाई र मकवानपुर जिल्लाका प्रहरी उपरीक्षक सीताराम रिजालको उपस्थिति रहेको थियो ।
